Microsoft korporasiyası Edge brauzeri üçün yeni bir funksiyanı sınaqdan keçirir. Bu funksiya avtomatik qaydada istənməyən və potensial təhlükəli tətbiqlərin yüklənməsini bloklamağa imkan verəcək. Bloklama funksiyası artıq Microsoft Edge brauzerinin beta versiyalarında mövcuddur ki, bu da onun sabit versiyalarda tezliklə istifadəyə verilməsi deməkdir.
Mövcud məlumatlara görə, Edge təhlükəli və zərərli proqramlar kimi tanınmayan tətbiqləri də bloklayacaq. İstenməyən tətbiqlər arasında gizli kriptovalyuta minerləri, çoxlu reklam məzmunu təqdim edən alətlər paneli və b. var. Yeni Edge brauzerində artıq phishing və zərərli proqramlardan qorumaq üçün SmartScreen aləti istifadə olunur, lakin yeni funksiya potensial təhlükəli proqramların yüklənməsindən qaçmağa kömək edəcək.
Bloklama funksiyası geniş istifadəçilər üçün hələ mövcud olmasa da, onun standart olaraq deaktiv olacağı məlumdur. İstifadəçilər bu aləti öz konfiqurasiya menyusundan aktivləşdirməlidirlər. Microsoft bu özəlliyi brauzerinə nə vaxt inteqrasiya edəcəyini isə hələ açıqlamayıb.
Qeyd etmək yerinə düşər ki, Google və Mozilla müştərilərinə zərərli proqramlar və phishingə qarşı qoruma vasitələri təqdim edir, lakin Microsoft yeni Edge funksiyasının digər alternativlərdən daha təkmil olduğunu iddia edir. Əvvəllər belə bir qoruma yalnız Microsoft Defender Advanced Threat Protection proqramı çərçivəsində korporativ müştərilərə təqdim olunurdu. İndi isə, istənməyən və təhlükəli proqramların yüklənməsindən qorunma bütün Edge brauzer istifadəçiləri üçün əlçatan olacaq.
Mənbə: 3dnews.ru
