Dəbdəbəli məhsulların istehsalı üzrə ixtisaslaşan Fransanın Louis Vuitton moda evi çox qeyri-adi yeni məhsulu - daxili çevik displeyli əl çantasını nümayiş etdirib.
Məhsul Nyu Yorkda (ABŞ) keçirilən Cruise 2020 tədbirində nümayiş etdirilib. Yeni məhsul müasir rəqəmsal texnologiyaların tanış şeylərlə necə inteqrasiya oluna biləcəyinin nümayişidir.
Məlumata görə, çantaya tikilmiş çevik ekran AMOLED texnologiyasından - üzvi işıq diodlarına əsaslanan aktiv matrisdən istifadə etməklə hazırlanıb. 1920×1440 piksel kifayət qədər yüksək təsvir ölçüsünə malikdir.
Nümayiş zamanı çantanın iki variantı - bir və iki bölməli displeylə nümayiş etdirilib. Bu panel müxtəlif foto və videoları göstərə bilər.
Təəssüf ki, məhsulun digər təfərrüatları açıqlanmır. Amma çantaya mikrokontroller və yaddaşa malik elektron modulun qurulduğu göz qabağındadır. Enerji batareya paketi tərəfindən təmin edilir.
Yeni məhsulun nə vaxt satışa çıxarılacağı ilə bağlı heç bir məlumat yoxdur. Əgər çanta kommersiya bazarına çıxarsa, onun qiyməti kifayət qədər yüksək olacaq - yəqin ki, bir neçə min ABŞ dolları.
Mənbə: 3dnews.ru