Avropa İttifaqı böyük kiberhücumlara cavab olaraq sanksiyaların tətbiqi üçün istifadə olunacaq xüsusi mexanizm yaradıb. Sanksiya siyasəti kiberhücumlarda iştirak edən şəxslərə, həmçinin haker qruplarına sponsorluq edən və ya onlara texniki dəstək göstərən tərəflərə qarşı tətbiq oluna bilər. Müvafiq orqanların qərarı ilə Avropa İttifaqı ərazisinə girişin qadağan edilməsi və maliyyə dondurulması şəklində məhdudlaşdırıcı tədbirlər tətbiq ediləcək. Bu yanaşma üzv dövlətlərin haker hücumlarına reaksiyasını sürətləndirməlidir.
Britaniyanın xarici işlər naziri Ceremi Hant bu addımı “həlledici addım” adlandırıb. Onun fikrincə, “düşmən aktorlar” çox uzun müddətdir ki, Avropa İttifaqının təhlükəsizliyini təhdid edir, kritik infrastrukturu məhv edir, ticarət sirlərini oğurlamağa və əsas demokratik prinsipləri pozmağa çalışırlar. Maraqlıdır ki, sanksiyalar təkcə haker hücumu aşkarlandıqda deyil, həm də belə bir əməliyyat həyata keçirməyə cəhd edildikdə tətbiq oluna bilər.
Bir sıra Avropa ölkələrinin məlumatına görə, Rusiya və Çin mütəmadi olaraq Avropa İttifaqında yerləşən obyektlərə kiberhücumlar həyata keçirir. Avropa liderləri Rusiyanın 23-26 may tarixlərində keçiriləcək Birlik parlament seçkilərinə təsir etməsindən narahatdırlar. Parlament seçkiləri Rusiyanın ABŞ-dakı prezident seçkilərinə müdaxilə etməkdə ittiham olunduqdan sonra ilk seçki olacaq. Bir müddət əvvəl “Fireeye” rus hakerlərinin Avropa dövlət qurumlarını, eləcə də Almaniya və Fransadakı media qurumlarını hədəf aldığını açıqlamışdı.
Mənbə: 3dnews.ru