Şəbəkə mənbələri Facebook-un gələn il öz kriptovalyutasını buraxmağı planlaşdırdığını bildirir. Bildirilir ki, 12 ölkəni əhatə edən yeni ödəniş şəbəkəsi 2020-ci ilin birinci rübündə istifadəyə veriləcək. GlobalCoin adlı kriptovalyutanın sınaqdan keçirilməsinə 2019-cu ilin sonunda başlanacağı da məlumdur.
Facebook-un planları haqqında daha ətraflı məlumatın bu yay ortaya çıxacağı gözlənilir. Hazırda şirkət nümayəndələri ABŞ Xəzinədarlığı və İngiltərə Bankının rəsmiləri ilə məsləhətləşmələr aparır, tənzimləmə məsələlərini müzakirə edirlər. Pul köçürmə şirkətləri, o cümlədən Western Union ilə də danışıqlar aparılır. Bu, şirkətin bank hesabı olmayan müştərilərin istifadə edə biləcəyi pul göndərmək üçün əlverişli və sürətli yollar axtardığını göstərir.
Ödəniş şəbəkəsinin yaradılması və öz kriptovalyutasının buraxılması layihəsinin kod adı Libradır. Onun həyata keçirilməsi ilk dəfə ötən ilin dekabrında elan edilib. Yeni ödəniş sistemi insanlara beynəlxalq valyutaları kriptovalyuta ilə dəyişməyə imkan verəcək. Qarşıya qoyulan vəzifələri yerinə yetirəcək müvafiq assosiasiya yaxın vaxtlarda İsveçrədə təşkil olunacaq.
Mütəxəssislər Facebook-un yeni layihəsinin nə qədər uğurlu ola biləcəyi ilə bağlı fikir ayrılığına düşmürlər. Məsələn, London İqtisadiyyat Məktəbinin tədqiqatçısı Qarrik Hileman hesab edir ki, GlobalCoin-in yaradılması layihəsi kriptovalyutaların qısa tarixində ən mühüm hadisələrdən birinə çevrilə bilər. Bəzi məlumatlara görə, hazırda dünyada təxminən 30 milyon insan kriptovalyutadan istifadə edir.
Mənbə: 3dnews.ru