Fransanın rəqabət orqanı Google-dan yerli nəşrlərə və xəbər agentliklərinə istifadə etdikləri məzmuna görə ödəniş etməyi tələb edən qərar çıxarıb. Bu məsələnin müvəqqəti həlli Aİ-nin Müəllif Hüquqları Qanununun Fransada qüvvəyə minməsindən sonra qüvvədədir. Buna əsasən, ötən ilin oktyabr ayından Google nəşriyyatlara məqalələrinin istifadə olunmuş fraqmentlərinə görə pul ödəməlidir.
Fransanın antiinhisar orqanı hesab edir ki, Google “hakimiyyət mövqeyindən sui-istifadə edərək çap sektoruna ciddi ziyan vurur”. Bu məsələni şərh edən Google nümayəndəsi şirkətin tənzimləyicinin tələblərinə əməl etmək niyyətində olduğunu təsdiqləyib. Qeyd olunub ki, Google ötən il müvafiq qanun qüvvəyə minəndən sonra nəşriyyatlarla əməkdaşlığa başlayıb və xəbərlərə investisiyanı artırıb.
Bununla belə, tənzimləyici qeyd etdi ki, "mətbuat sektorunda bir çox naşirlər Google-a müəllif hüquqları ilə qorunan məzmundan istifadə etmək və göstərmək üçün lisenziyalar veriblər, lakin şirkətdən heç vaxt pul kompensasiyası almayıblar." Hesab edilir ki, Google Fransada axtarış mühərriki bazarının 90%-nə sahib olduğu üçün nəşriyyatçılar məzmunu pulsuz verməyə məcbur olublar. Əks halda, məqalələrindən çıxarışlar Google axtarış nəticələrində dərc olunmasa, nəşriyyatçılar istifadəçi trafikinin azalmasından əziyyət çəkə bilər.
Antiinhisar xidmətinin qərarı bir neçə böyük xəbər orqanından və əmək təşkilatlarından daxil olan şikayətlərdən sonra verilib. Google nəşriyyatçılarla danışıqlar apararkən, şirkət cari (ödənişsiz) müqavilələri çərçivəsində xəbər parçaları, foto və videoları göstərməyə davam etməlidir. Tərəflər razılığa gəldikdən sonra Google-dan 2019-cu ilin oktyabr ayına qədər geriyə dönük olaraq kompensasiya ödəməsi tələb olunacaq.
Mənbə: 3dnews.ru