İnstaqramdan nəyisə sildiyiniz zaman onun həmişəlik yox olacağını gözləyirsiniz. Lakin reallıqda bunun belə olmadığı üzə çıxıb. İT təhlükəsizliyi üzrə tədqiqatçı Sauqat Pokharel bir ildən çox əvvəl Instagram-dan silinmiş foto və yazılarının surətlərini əldə edə bilib. Bu, istifadəçilər tərəfindən silinən məlumatların sosial şəbəkənin serverlərindən heç bir yerdə yoxa çıxmadığını göstərir.
Instagram bunun öz sistemindəki səhvlə bağlı olduğunu və indi aradan qaldırıldığını açıqladı. Üstəlik, tədqiqatçı bu səhvi aşkar etdiyinə görə 6000 dollar mükafat aldı. Məlumatlara görə, Pokharel problemi 2019-cu ilin oktyabrında müəyyən edib və bu ayın əvvəlində aradan qaldırılıb.
“Bir tədqiqatçı bəzi Instagram istifadəçilərinin “Məlumatınızı Yüklə” alətindən istifadə etdikləri halda onların silinmiş şəkillərinin və yazılarının ehtiyat nüsxəyə daxil edilməsi ilə bağlı problem barədə məlumat verdi. Biz problemi həll etdik və bu səhvin təcavüzkarlar tərəfindən istismar edilməsinə dair heç bir sübut tapmadıq. Problemlə bağlı bizi məlumatlandırdığı üçün tədqiqatçıya təşəkkür edirik”, - İnstaqram nümayəndəsi bu məsələyə münasibət bildirib.
Problemin nə qədər geniş yayıldığı və bunun bütün Instagram istifadəçilərinə, yoxsa onların bir hissəsinə təsir edib-etmədiyi hələ də aydın deyil. Tipik olaraq, istifadəçi onlayn xidmətlərdən və ya sosial şəbəkələrdən hər hansı məlumatı sildikdə, onun daxili serverlərdən yox olmasına bir müddət vaxt keçir. İnstaqrama gəlincə, rəsmi məlumatlara görə, silinmiş istifadəçi məlumatları 90 gün ərzində sosial şəbəkənin serverlərində saxlanmağa davam edir, bundan sonra isə həmişəlik silinir.
Mənbə:
Mənbə: 3dnews.ru