Kaspersky Lab mobil cihazları rəqəmsal təhlükələrdən qorumaq üçün neyron şəbəkələr əsasında maşın öyrənmə texnologiyaları və süni intellekt (AI) sistemlərindən istifadə edən Android üçün Kaspersky Internet Security proqram həllinə yeni funksional modul əlavə edib.
Söhbət Android üçün Cloud ML texnologiyasından gedir. İstifadəçi smartfon və ya planşetə proqram yüklədikdə, yeni AI modulu quraşdırılmış proqramı təhlil etmək üçün avtomatik olaraq milyonlarla zərərli proqram nümunələri üzərində “təlim edilmiş” maşın öyrənmə alqoritmlərindən istifadə edir. Bu halda sistem təkcə kodu yox, həm də yeni yüklənmiş proqramın bir çox müxtəlif parametrlərini, məsələn, onun tələb etdiyi giriş hüquqlarını da yoxlayır.
Kaspersky Lab-ın məlumatına görə, Android üçün Cloud ML hətta əvvəllər kibercinayətkar hücumlarda rast gəlinməyən spesifik və yüksək dərəcədə dəyişdirilmiş zərərli proqram təminatını tanıyır.
Araşdırmalar göstərir ki, “Android” əməliyyat sistemi ilə işləyən mobil qurğuların sahibləri getdikcə daha çox zərərli proqram təminatının yayılması üçün müxtəlif kanallardan, o cümlədən “Google Play” proqramlar mağazasından istifadə edən kibercinayətkarların qurbanına çevrilirlər. Virus analitiklərinin fikrincə, 2018-ci ildə əvvəlki illə müqayisədə Android smartfon və planşetləri üçün zərərli quraşdırma paketləri iki dəfə çox olub.
Siz internet saytında Android üçün Kaspersky Internet Security proqramını yükləyə bilərsiniz . Proqram pulsuz və kommersiya nəşrlərində təqdim olunur və Android 4.2 və daha yüksək versiyalarla işləyən cihazlara uyğun gəlir.
Mənbə: 3dnews.ru