Beynəlxalq ödəniş sistemi Mastercard, RBC-nin məlumatına görə, tezliklə Rusiyada kartsız bankomatlar vasitəsilə nağd pul çıxarmaq üçün xidmət təqdim edə bilər.
Söhbət QR kodlarının istifadəsindən gedir. Yeni xidməti əldə etmək üçün istifadəçi öz smartfonunda xüsusi mobil proqram quraşdırmalı olacaq.
Bank kartı olmadan vəsaitlərin qəbulu prosesi bankomatın ekranından QR kodun skan edilməsini və smartfon vasitəsilə biometrikadan istifadə etməklə şəxsiyyətinizin təsdiqlənməsini nəzərdə tutur (barmaq izi və ya üz tanıma sistemindən istifadə edilə bilər). Lazımi yoxlamaları tamamladıqdan sonra bankomat nağd pulu verəcək.
“Birinci mərhələdə xidmət yalnız layihəyə qoşulan bankların Mastercard kart sahibləri üçün əlçatan olacaq. Gələcəkdə Mastercard digər ödəniş sistemlərinin kartlarını xidmətə qoşmağı planlaşdırır”, - RBC qeyd edir.
Bildirilir ki, “Mastercard” hazırda maraqlı kredit təşkilatları ilə xidmətin tətbiqi ilə bağlı danışıqlar aparır. Yeni xidməti göstərmək üçün banklar öz bankomatlarında proqram təminatını yeniləməli olacaqlar.
Yeni xidmətin nə vaxt istifadəyə veriləcəyi barədə hələlik məlumat yoxdur.
Mənbə: 3dnews.ru