Massaçusets Texnologiya İnstitutu telekommunikasiya şirkətləri Huawei və ZTE ilə maliyyə və tədqiqat əlaqələrini dayandırmaq qərarına gəlib. Buna səbəb Amerika tərəfinin Çin şirkətlərinə qarşı apardığı araşdırmalar olub. Bundan əlavə, MİT Rusiya, Çin və Səudiyyə Ərəbistanı ilə hansısa şəkildə bağlı olan layihələrə nəzarəti gücləndirdiyini açıqlayıb.
Xatırladaq ki, ABŞ prokurorları daha əvvəl Huawei və onun maliyyə direktoru Meng Wanzhou-nu ABŞ-ın İrana qarşı tətbiq etdiyi sanksiyaları pozmaqda ittiham etmişdilər. Bundan əlavə, Çin telekommunikasiya avadanlığı istehsalçısı ticarət sirlərini pozmaqda və Çinin xeyrinə casusluqda ittiham olunub. Huawei-nin bütün ittihamları rədd etməsinə baxmayaraq, Amerika tərəfi müttəfiqlərinə Çin satıcısının avadanlıqlarından istifadəni dayandırmağı tövsiyə etməklə yanaşı, istintaqı dayandırmaq niyyətində deyil. Öz növbəsində ZTE İrana qarşı sanksiyaları pozmaqda ittiham edilib. Qeyd edək ki, 2019-cu ilin avqust ayına qədər Huawei müxtəlif sahələrdə MİT tədqiqatlarını maliyyələşdirən şirkətlər sırasında olmağa davam edəcək.
Rusiya, Çin və Səudiyyə Ərəbistanı şirkətlərinin iştirakı ilə həyata keçirilən layihələrə nəzarətin gücləndirilməsinə gəlincə, ixrac nəzarəti, əqli mülkiyyət, iqtisadi rəqabət qabiliyyəti, məlumatların təhlükəsizliyi və s. ilə bağlı risklərin ətraflı araşdırılması nəzərdə tutulur.
Mənbə: 3dnews.ru