Çin texnoloji nəhəngi Huawei ABŞ-ın sözdə qara siyahısında qalmaqda davam edir və bu, ABŞ şirkətləri ilə iş aparmağı çətinləşdirir. Bununla belə, Huawei-nin qurucusu Ren Zhengfei ABŞ-ın sanksiyalarını səmərəsiz hesab edir və qeyd edir ki, şirkət ABŞ olmadan da yaşaya biləcək.
“ABŞ olmadan özümüzü yaxşı hiss edirik. ABŞ-Çin ticarət danışıqları məni maraqlandırmır. Biz ABŞ-ın Huawei-ni ABŞ şirkətlərinin işləyə bilməyəcəyi qurumlar siyahısından çıxaracağını gözləmirik. Onlar bizi həmişəlik orada saxlaya bilərlər, çünki Birləşmiş Ştatlar olmadan biz yaxşı olacağıq”, cənab Zhengfei bildirib. O, həmçinin qeyd edib ki, “Huawei” ticarət müharibəsinin obyekti deyil, çünki şirkətin ABŞ-da işgüzar əlaqələri çox azdır.
Qeyd edək ki, 2018-ci ildə “Huawei” Amerika şirkətlərindən ümumilikdə 11 milyard dollar dəyərində mal alıb.Çin şirkəti “Alphabet” və “Microsoft” şirkətlərinin proqram həlləri ilə yanaşı, müxtəlif istehsalçılardan çoxlu sayda çip alıb. Bu il Huawei gələcəkdə ABŞ şirkətlərini əvəz edəcək alternativ təchizatçılar axtarmağa məcburdur. Bundan əlavə, şirkət öz çipləri və proqram təminatı üzərində işləməyə davam edir.
Maraqlıdır ki, Huawei ABŞ şirkətlərindən məhsul almağa davam edir, çünki bir çox hallarda ABŞ-dan kənarda istehsal olunan mallar sanksiyalara məruz qalmır. Bu, Intel və Qualcomm da daxil olmaqla bir neçə ABŞ şirkətinə Huawei ilə işgüzar əlaqələri bərpa etməyə imkan verdi.
ABŞ-ın təzyiqlərinə baxmayaraq, Huawei bütün dünyada 5G müqavilələri qazanmağa davam edir və smartfon satışları əsasən daxili bazara tədarüklərin artması hesabına artır.
Mənbə: 3dnews.ru