Panasonic Yaponiyanın FamilyMart mağazalar şəbəkəsi ilə birgə sifətin tanınması əsasında biometrik təmassız ödəniş texnologiyasını sınaqdan keçirmək üçün pilot layihəyə start verib.
Yeni texnologiyanın sınaqdan keçirildiyi mağaza Tokionun cənubundakı Yokohama şəhərində Panasonic zavodunun yanında yerləşir və FamilyMart ilə françayzinq müqaviləsi əsasında birbaşa elektronika istehsalçısı tərəfindən idarə olunur. Hazırda yeni ödəniş sistemi yalnız Panasonic işçiləri üçün əlçatandır, onlar qeydiyyat prosedurundan keçməlidirlər, bura üzlərinin skan edilməsi və bank kartı məlumatlarının əlavə edilməsi daxildir.
Texnologiya Panasonic-in təsvirin təhlili sahəsindəki inkişaflarından istifadə etməklə və alıcının skan edilməsi üçün kameralar dəsti olan xüsusi terminaldan istifadə etməklə həyata keçirilir. Bundan əlavə, FamilyMart və Panasonic arasında əməkdaşlıq çərçivəsində anbarda malların mövcudluğunun qeydə alınması və bildirilməsi üçün avtomatlaşdırılmış sistem hazırlanıb. FamilyMart prezidenti Takashi Sawada yenilikləri yüksək qiymətləndirib və ümid edir ki, bu texnologiyalar tezliklə şəbəkənin bütün mağazalarında tətbiq olunacaq.
Bununla belə, biometrik ödənişlərin gələcəyi hələ də bəzi şübhələr yaradır. Məsələn, Oracle tərəfindən aparılan sorğu göstərdi ki, istehlakçıların əhəmiyyətli bir hissəsi pərakəndə satış şəbəkələrinin biometrik məlumatlarını qəbul etməsindən ehtiyatlanır. Göründüyü kimi, inkişaf etmiş bazarlarda iri pərakəndə satış şəbəkələrinin hələ də bu istiqamətdə heç bir addım atmamasının, inkişaf etməkdə olan bazarlarda isə yeni texnologiyalara marağın durmadan artmasının və onların gələcəyinin kifayət qədər nikbin qiymətləndirilməsinin əsas səbəbi də budur.
Mənbə: 3dnews.ru