Rusiya paytaxtında işləyən tam elektrik avtobusları getdikcə populyarlaşır. Bu barədə Moskva merinin və hökumətinin rəsmi portalı məlumat yayıb.
Ötən ilin sentyabrında Moskvada elektrik avtobusları sərnişin daşımağa başlayıb. Bu nəqliyyat növü atmosferə zərərli tullantıların səviyyəsini azaltmağa imkan verir. Trolleybuslarla müqayisədə elektrobuslar daha yüksək manevr qabiliyyəti ilə xarakterizə olunur.
Hazırda Rusiya paytaxtında 60-dan çox elektrik avtobusu işləyir. Onlar üçün Moskvanın enerji infrastrukturuna qoşulmaqda davam edən 62 doldurma stansiyası quraşdırılıb.
“Elektrikli avtobusların sərnişin axını durmadan artır. Əgər bu ilin yanvar ayında onlardan hər gün 20 min insan istifadə edirdisə, martda artıq 30 min nəfər istifadə edib. Elektrikli avtobuslar istifadəyə verildiyi gündən 2,5 milyondan çox sərnişin daşıyıb”, - məlumatda deyilir.
Həmçinin qeyd edilir ki, Moskva elektrobusları texniki göstəricilərinə görə dünyada ən yaxşılar sırasındadır. Avtomobillər videomüşahidə sistemi, qadcetləri doldurmaq üçün USB konnektorlar və iqlim nəzarəti ilə təchiz edilib. Bundan əlavə, sərnişinlər Wi-Fi texnologiyasından istifadə edərək pulsuz internetə çıxış əldə edirlər.
Elektrikli avtobus demək olar ki, səssizcə hərəkət edir. O, son dayanacaqlarda yerləşən ultra sürətli doldurma stansiyalarında pantoqrafdan istifadə etməklə doldurulmalıdır.
Mənbə: 3dnews.ru