Onlayn mənbələrin məlumatına görə, Cənubi Koreyanın “Samsung” şirkəti özünün “TV Plus” striminq xidmətini mobil cihazlara gətirmək niyyətindədir. Hazırda uyğun gələn Samsung smart televizorlarının sahibləri üçün əlçatan olan TV Plus funksiyalarını mobil qacetlərə ötürməyə imkan verəcək proqram hazırlanır.
Xatırladaq ki, ötən il istifadəyə verilmiş TV Plus axın xidməti pulsuzdur və 2016-cı ildən etibarən buraxılmış smart televizorlarda mövcuddur. İstehsalçı hələlik xidmətin mobil versiyasını açıqlamayıb, lakin mənbə bunun tezliklə baş verəcəyinə inanır.
Tətbiqin uyğunluğu və mövcudluğu haqqında hələlik əlavə məlumat olmasa da, onun Samsung Galaxy cihazları üçün eksklüziv olacağı gözlənilir. Bunu TV Plus-ın hazırda yalnız Samsung smart televizorlarında işləməsi də təsdiqləyir ki, bu da istehsalçıya digər şirkətlərlə rəqabətdə müəyyən üstünlüklər verir. Çox güman ki, xidmətin mobil versiyası smartfonlar, ola bilsin ki, Samsung-un planşetləri tərəfindən dəstəklənəcək.
Smartfonlarda və planşetlərdə pulsuz yayım xidmətindən istifadə etmək imkanı Samsung cihazlarının sahibləri arasında çox populyar ola bilər. Gözlənilir ki, smartfonlarda TV Plus mövcud telekanallara baxmaq imkanı verəcək, həmçinin smart televizorlar üçün tətbiqin arsenalında mövcud olan bütün funksiyalara çıxışı təmin edəcək. Samsung-un mobil qurğularda TV Plus-ı nə vaxt təqdim etməyi planlaşdırdığı hələ məlum deyil.
Mənbə: 3dnews.ru