Texnologiya şirkətləri sosial məsafə dönəmində məhsul buraxmağın müxtəlif yollarını sınaqdan keçirərkən, Google, Android 11 platformasının ilk ictimai beta versiyasının 3 iyun tarixində YouTube-da təşkil olunacaq onlayn yayımda təqdim ediləcəyini elan etdi. Şirkət, adətən həmin tarixdə planlaşdırılan The Beta Launch Show onlayn tədbirinə həsr olunmuş reklam videosu yayımlayıb.
Bu tədbirin, bu il koronavirus pandemiyası səbəbindən ləğv edilən Google I/O konfranslarında adətən baş verən bütün məsələləri əhatə edəcəyi gözlənilir. Məlumatlara əsasən, inkişafçılar çıxış zamanı izləyiciləri şirkətin müxtəlif məhsulları ilə bağlı son yeniliklər, elanlar və xəbərlərlə tanış edəcəklər.
Gələcək tədbirin bir hissəsi Google-un Android inkişafı üzrə vitse-prezidenti Deiv Burk (Dave Burke) və məhsul idarəçiliyi direktoru Stefanı Katbərtsonun (Stephanie Cuthbertson) müsahibəsinə həsr ediləcək, onlar müxtəlif sualları cavablandıracaqlar.
Android 11-in əvvəlki versiyası fevral ayında buraxılmışdı, lakin bu versiya yalnız inkişafçılar üçün nəzərdə tutulmuşdu, buna görə də ictimai beta versiyasının buraxılması adi istifadəçilər üçün önəmli bir hadisədir. Google-un bu ilin may ayında ilk beta versiyasını buraxacağı gözlənilirdi, lakin elan edilən tarixə əsasən inkişafçıların bir az gecikdiyini düşünmək olar. Bu, koronavirus səbəbindən yaranan gərgin vəziyyətdən dolayı da təəccüblü deyil.
Mənbə: 3dnews.ru
