Onlayn mənbələrin məlumatına görə, Cənubi Koreyanın “Samsung Electronics” şirkəti gələn ayın əvvəlində ABŞ-da keçiriləcək illik istehlak elektronikası sərgisində çərçivəsiz premium televizor təqdim edəcək.
Mənbə bildirir ki, bu yaxınlarda keçirilən daxili iclasda Samsung rəhbərliyi çərçivəsiz televizorların kütləvi istehsalına başlamağı təsdiqləyib. Onun gələn ilin fevralında istifadəyə verilməsi gözlənilir.
Yeni televizorların əsas özəlliyi onların tamamilə çərçivəsiz dizayna malik olmasıdır. Maraqlıdır ki, hazırda belə modellər hələ bazarda təqdim edilməyib. Buna televizor panelinin əsas gövdəyə qoşulması texnologiyasındakı dəyişikliklər sayəsində nail olunub. Bunu həyata keçirmək üçün Samsung Cənubi Koreyanın “Shinsegye Engineering” və “Taehwa Precision” şirkətləri ilə əməkdaşlıq edib, bu şirkətlər avadanlıq və bəzi komponentləri təchiz edib.
“Əslində çərçivəsi olan digər “sıfır çərçivə” adlanan məhsullardan fərqli olaraq, Samsung-un məhsulu həqiqətən çərçivəsizdir. “Samsung” dünyada belə ekstremal dizaynı tətbiq edən ilk şirkət olub”, - deyə layihədə iştirak edən tərtibatçılardan biri bildirib. O, həmçinin qeyd edib ki, televizorun çərçivəsiz dizaynı bəzi Samsung tərtibatçıları tərəfindən tənqid edilib, çünki onlar son məhsulun çox kövrək olacağından qorxurdular.
Təəssüf ki, Samsung çərçivəsiz televizorları ilə bağlı heç bir texniki xüsusiyyət açıqlanmayıb. Yalnız məlumdur ki, istehsalçı 65 düym və ya daha çox diaqonalı olan modeli buraxmaq niyyətindədir. Çox güman ki, yeni Samsung televizorları haqqında daha çox məlumat CES 2020-dən sonra görünəcək.
Mənbə: 3dnews.ru