“Vedomosti” qəzetinin yazdığına görə, “Sberbank” “ağıllı” məişət texnikasının, xüsusən də intellektual soyuducunun yaradılmasını nəzərdən keçirir.
Əqli Mülkiyyət üzrə Federal Xidmət (Rospatent), qeyd edildiyi kimi, artıq Sberbank-a “ağıllı” soyuducu üçün patent verib. Müvafiq ərizə ötən ilin noyabrında verilib.
Soyuducunun müxtəlif sensorlar və kameralarla təchiz edilməsi təklif olunur. Bu, içəridə olan məhsulların sayını avtomatik izləməyə və onların istifadə müddətinə nəzarət etməyə imkan verəcək.
Tərtibatçıların fikrincə, məlumatlar mobil proqrama ötürüləcək. Bundan əlavə, istifadəçilər veb-interfeys vasitəsilə məlumatlara baxa biləcəklər.
“Beləliklə, istifadəçi malların alınması ilə bağlı qərar qəbul edə və ya sifarişini avtomatik rejimdə qura biləcək. Soyuducu Wi-Fi, ikinci və ya üçüncü nəsil mobil rabitə vasitəsilə digər cihazlarla əlaqə saxlaya biləcək”, - “Vedomosti” qəzeti yazır.
Qeyd edək ki, internetə qoşulmuş “ağıllı” soyuducular artıq müxtəlif istehsalçılar tərəfindən təklif olunur. Sberbank-ın bu bazara girib-girməyəcəyi hələ aydın deyil.
Mənbə: 3dnews.ru