Moskva meri Sergey Sobyanin Rusiya Daxili İşlər Nazirliyinin Baş İdarəsinin kollegiyasının genişləndirilmiş iclasında paytaxtda videomüşahidə sisteminin inkişafı barədə danışıb.
Onun sözlərinə görə, ötən il Moskvada şəhərin videomüşahidə sistemi əsasında sifətin tanınması texnologiyaları ilə eksperimentlər aparılıb. Bu həll yüksək səmərəlilik nümayiş etdirdi və buna görə də bu il yanvarın 1-dən onun tətbiqinə kütləvi şəkildə başlanıldı.
Xüsusilə, adi videokameralar HD keyfiyyətli cihazlarla əvəz olunur. Bundan əlavə, demək olar ki, bütün Rusiya paytaxtında sifətin tanınması ilə süni intellekt sistemləri birləşdirilir.
Qeyd olunub ki, ötən il Moskvada sifətin tanınması sistemi sayəsində axtarışda olan onlarla vətəndaşı saxlamaq mümkün olub. Payızın əvvəlinə qədər paytaxt metrosunda sistem fəaliyyətə başlayacaq.
“Sentyabrın 1-dək metropolitendə bu sistem tam şəkildə tətbiq olunacaq. Bu nə deməkdir? Bu o deməkdir ki, axtarışda olan şəxslər bir neçə saniyə ərzində metroda müəyyən ediləcək”, - Sergey Sobyanin bildirib.
Bundan əlavə, sistem əsasında video analitika platforması yerləşdirilə bilər. Bu, demək olar ki, avtomatik olaraq şəhərdə cinayətin qaynar nöqtələrini müəyyən etməyə imkan verəcəkdir.
Mənbə: 3dnews.ru