"İnterfaks"ın məlumatına görə, AliExpress platformasında alınan malları X5 Retail Group şirkətinin mağazalarında əldə etmək olar.
Xatırladaq ki, X5 Retail Group Rusiyanın aparıcı multiformatlı qida pərakəndə satış şirkətlərindən biridir. O, Pyaterochka mağazalarını, həmçinin Perekrestok və Karusel supermarketlərini idarə edir.
Belə ki, X5 Omni (pərakəndə satış şəbəkələrində yeni poçt xidmətlərini inkişaf etdirən X5 bölməsi) ilə Alibaba Group-un törəmə şirkəti olan Cainiao arasında əməkdaşlıq müqaviləsi bağlandığı bildirilir.
Müştərilər AliExpress-dən malları yuxarıda qeyd olunan bütün şəbəkələrin - Pyaterochka, Perekrestok və Karusel-in bağlama terminallarında və çatdırılma məntəqələrində ala biləcəklər. Hazırda xidmətin İT inteqrasiyası tamamlanmaq üzrədir və gələn ay sifarişlərin sınaq çatdırılmasına başlanacaq.
Yeni xidmət X5 logistikasından istifadə etməklə “X5 Omni” poçt xidmətlərinin texnoloji platforması əsasında təqdim olunacaq. Sonradan digər onlayn mağazalar da bu platformaya qoşula bilər.
Mənbə: 3dnews.ru