Los-Ancelesdə atmosferə sıfır zərərli maddələr buraxan yeni Toyota yük maşınının təqdimatı keçirilib. Layihə Kenworth Truck Company, şəhər limanı və Kaliforniya Hava Resursları Şurası ilə birgə həyata keçirilib. Təqdim olunan prototip Fuel Cell Electric ağır yük maşını (FCET) hidrogen elementləri əsasında işləyir və tullantı kimi su hasil edir.
Təqdim olunan yük maşını 2017-ci ildən inkişafı davam edən prototiplərə əsaslanır. Rəsmi məlumatlara görə, FCET yanacaq doldurmadan təxminən 480 km məsafə qət etməyə qadirdir ki, bu da yük maşınlarının orta gündəlik yürüşündən demək olar ki, 2 dəfə çoxdur.
Şirkət Los-Anceles limanından yüklərin şəhər daxilində və ondan kənarda müxtəlif yerlərə daşınması üçün istifadə olunacaq 10 yüksək texnologiyalı yük maşını istehsal etmək niyyətindədir. Əvvəlki prototiplər kimi, təqdim olunan yük maşını Kenworth T680 Class 8 traktorunun əsasında hazırlanıb.Tədqiqatçıların qarşısına qoyduğu əsas məqsəd zərərli maddələrin tullantılarının səviyyəsini azaltmaq üçün ekoloji cəhətdən təmiz nəqliyyatdan istifadə etməklə daşımaları təşkil etməkdir.
Şirkət nümayəndələri qeyd edirlər ki, Toyota geniş tələbatları ödəməyə kömək edəcək və zərərli maddələr istehsal etməyən elektromobillər yaratmağa imkan verən texnologiyaları fəal şəkildə inkişaf etdirməyə davam edir. Gələcəkdə şirkət yük maşınları üçün hidrogen yanacaq elementlərinin istehsalı texnologiyalarının təşviqini davam etdirmək niyyətindədir.
Mənbə: 3dnews.ru