İnformasiya təhlükəsizliyi üzrə tədqiqatçı İbrahim Baliç “Android” platforması üçün “Twitter” mobil proqramında boşluq aşkar edib və bu boşluqdan istifadə ona sosial şəbəkənin müvafiq istifadəçi hesabları ilə 17 milyon telefon nömrəsini uyğunlaşdırmağa imkan verib.
Tədqiqatçı 2 milyard mobil telefon nömrəsindən ibarət məlumat bazası yaradıb və sonra onları təsadüfi qaydada Twitter mobil proqramına yükləyib və bununla da onlarla əlaqəli istifadəçilər haqqında məlumat əldə edib. Araşdırmaları zamanı Baliç Fransa, Yunanıstan, Türkiyə, İran, İsrail və bir sıra digər ölkələrdən olan Twitter istifadəçiləri haqqında məlumat toplayıb, onların arasında yüksək vəzifəli məmurlar və mühüm siyasi xadimlər də var.
Baliç Twitter-i zəiflik barədə xəbərdar etməyib, lakin o, bəzi istifadəçilərə birbaşa xəbərdarlıq edib. Tədqiqatçının işi dekabrın 20-də Twitter administrasiyası məlumat toplamaq üçün istifadə edilən hesabları blokladıqdan sonra dayandırılıb.
Twitter sözçüsü Aly Pavela bildirib ki, şirkət bu cür xəbərləri “ciddi” qəbul edir və hazırda Baliçin fəaliyyətini fəal şəkildə araşdırır. Həmçinin bildirilib ki, şirkət tədqiqatçının yanaşmasını bəyənmir, çünki o, Twitter nümayəndələri ilə əlaqə saxlamaq əvəzinə zəifliyin aşkarlandığını açıq elan edib.
“Biz bu kimi hesabatları ciddi qəbul edirik və zəifliyin təkrar istifadə edilə bilməyəcəyinə əmin olmaq üçün onları diqqətlə nəzərdən keçiririk. Problem məlum olanda biz insanların şəxsi məlumatlarına qeyri-düzgün şəkildə daxil olmaq üçün istifadə edilən hesabları dayandırdıq. Twitterdən istifadə edən insanların məxfiliyinin və təhlükəsizliyinin qorunması prioritet məsələdir. Biz Twitter-in API-lərindən sui-istifadə hallarını tez bir zamanda aradan qaldırmaq üçün işləməyə davam edəcəyik”, - Eli Pavel bildirib.
Mənbə: 3dnews.ru