Onlayn mənbələrin məlumatına görə, rəqəmsal valyutalarla bağlı birgə araşdırma aparan altı ölkənin mərkəzi banklarının rəhbərləri bu ilin aprelində Vaşinqtonda baş tuta biləcək görüş keçirməyi düşünürlər.
Danışıqlarda Avropa Mərkəzi Bankının rəhbəri ilə yanaşı, Böyük Britaniya, Yaponiya, Kanada, İsveç və İsveçrənin mərkəzi banklarının rəhbərləri də iştirak edəcək. Yaponiya Bankının nümayəndəsi bildirib ki, görüşün dəqiq tarixi hələ müəyyən edilməyib. O, həmçinin qeyd edib ki, mərkəzi banklar pul emitentləri kimi aktual qalmaq üçün sürətli rəqəmsallaşmaya çevik reaksiya verməlidirlər.
Qeyd olunan ölkələrin mərkəzi banklarının nümayəndələri ötən ay rəqəmsal valyutaların bazara çıxarılması ilə bağlı məsələləri müzakirə etmək üçün görüş keçirmək niyyətində olduqlarını bəyan etmişdilər. Bundan əlavə, görüşdə transsərhəd hesablaşmaların optimallaşdırılması yollarının və gələcəkdə mərkəzi bankların rəqəmsal valyutalar buraxacağı təqdirdə həll edilməli olan təhlükəsizlik məsələlərinin müzakirəsi planlaşdırılır. İclasla bağlı aralıq hesabatın bu ilin iyun ayına qədər hazırlanacağı, yekun variantın isə payızda olacağı gözlənilir.
Bütün dünya üzrə mərkəzi banklar öz rəqəmsal valyutalarını işə salmağı düşünürlər. Böyük mərkəzi banklar arasında Çin öz rəqəmsal valyutasını inkişaf etdirməkdə liderlik edir, baxmayaraq ki, layihə haqqında çox az məlumat var. Yaponiya Bankı Avropa Mərkəzi Bankı ilə bu sahədə tədqiqat layihəsi həyata keçirib, lakin yaxın gələcəkdə öz rəqəmsal valyutasını buraxmaq fikrində olmadığını bəyan edib.
Mənbə: 3dnews.ru
