За апошні час шматлікія вытворцы матчыных поплаткаў выпусцілі абнаўленні BIOS для сваіх вырабаў з працэсарным раздымам Socket AM4, якія забяспечваюць падтрымку новых працэсараў Ryzen 3000. Кампанія Gigabyte не стала выключэннем, аднак яе абнаўленні атрымалі адну вельмі цікавую асаблівасць – яны забяспечваюць некаторым поплаткам падтрымку новага інтэрфейсу PCI Express 4.0.
Дадзеная асаблівасць была выяўлена адным з карыстачоў Reddit. Пасля абнаўлення BIOS матчынага поплатка Gigabyte X470 Aorus Gaming 7 Wi-Fi да версіі F40 у наладах канфігурацыі слотаў PCIe з'явілася магчымасць абраць рэжым "Gen4". Рэсурс Tom's Hardware пацвярджае дадзенае паведамленне і адзначае, што ў папярэдняй версіі BIOS F3c не было магчымасці абраць рэжым PCIe 4.0.
Нажаль, кампанія Gigabyte пакуль што афіцыйна не анансавала падтрымку PCI Express 4.0 актуальнымі матчынымі поплаткамі на чыпсэтах 300 – і 400-й серый. З-за гэтага на дадзены момант складана сказаць, якія менавіта платы атрымаюць падтрымку больш хуткаснага інтэрфейсу, і якія ўвогуле будуць абмежаванні. А яны, напэўна, будуць, бо дадатковая прапускная здольнасць наўрад ці можа ўзяцца з ніадкуль.
Яшчэ ў пачатку гэтага года сама AMD заявіла, што пры пэўных умовах матчыны поплаткі на чыпсэтах 300 – і 400-й серый змогуць атрымаць падтрымку PCIe 4.0. Аднак кампанія пакінула рэалізацыю дадзенай асаблівасці на меркаванне вытворцаў матчыных поплаткаў. Гэта значыць сам вытворца вольны выбіраць, ці жадае ён дадаваць падтрымку хутчэйшага інтэрфейсу сваім поплаткам. І таксама AMD заявіла, што большасць вытворцаў матчыных поплаткаў ці наўрад стануць клапаціцца аб даданні PCIe 4.0 у свае актуальныя рашэнні.
У любым выпадку, на існых матчыных поплатках падтрымка PCIe 4.0 будзе абмежавана. Паведамляецца, што для "ператварэння" PCIe 3.0 у хутчэйшы PCIe 4.0 даўжыня лініі ад слота да працэсара не павінна перавышаць шэсць цаляў. У адваротным выпадку накладваюцца ўжо фізічныя абмежаванні. Для працы PCIe 4.0 на большай адлегласці неабходны новыя камутатары, мультыплексары і рэдрайверы, якія падтрымліваюць хутчэйшую перадачу сігналаў.
Атрымліваецца, што забяспечыць падтрымку больш хуткаснага інтэрфейсу атрымаецца толькі першаму слоту PCI Express x16, размешчанаму бліжэй за ўсё да працэсарнага раздыма. Таксама слоты, падлучаныя да камутатара PCIe 3.0, не змогуць падтрымліваць стандарты PCIe 4.0. Усе лініі PCIe, падлучаныя да чыпсэта, таксама не могуць быць абноўлены да навейшай версіі. Ну і вядома, для працы PCIe 4.0 будзе патрэбен працэсар Ryzen 3000.
У выніку атрымліваецца, што падтрымка PCIe 4.0 можа быць дададзеная ў актуальныя матчыны поплаткі толькі ў даволі абмежаваным выглядзе і не на ўсіх матчыных поплатках. Яе хутчэй можна назваць прыемным бонусам, які атрымаюць некаторыя ўладальнікі сістэм з Socket AM4. Поўную ж падтрымку новага стандарту забяспечаць толькі новыя матчыны поплаткі на чыпсэтах 500-й серыі.
Крыніца: 3dnews.ru