Новая версія браўзэра Google Chrome выйдзе з цэлай серыяй паляпшэнняў для настольных і мабільных платформаў. А яшчэ яна атрымае асаблівасць спецыяльна пад Windows 10. Паведамляецца, што Chrome 74 будзе адаптавацца да візуальнага стылю афармлення, які выкарыстоўваецца ў аперацыйнай сістэме. Інакш кажучы, тэма афармлення браўзэра будзе аўтаматычна падладжвацца пад цёмную ці светлую тэму "дзясяткі".
Таксама ў 74-й версіі з'явіцца магчымасць адключаць анімацыю пры праглядзе кантэнту. Гэта дазволіць ухіліць непрыемны эфект паралаксу пры пракрутцы старонкі. Акрамя таго, у Google Chrome 74 з'явяцца новыя параметры, якія прадухіляюць аўтаматычную загрузку дадзеных. Гэта дазволіць пазбегнуць пранікнення на мэтавую сістэму вірусаў.
Паведамляецца, што бэта-версія Google Chrome 74 ужо даступная, так што тым, каму не церпіцца паспрабаваць навінку, можна спампаваць яго па спасылцы. Стабільная ж версія з'явіцца 23 красавіка.
Пры гэтым адзначым, што аналагічная праца праводзіцца і ў браўзэры Opera. Падтрымка цёмнага рэжыму на ўзроўні праграмы ўжо ёсць у дэвелаперскай версіі Opera 61. Пры гэтым, калі раней яго трэба было ўключаць уручную, то зараз, як і ў Chrome 74, праграма будзе рэагаваць на налады афармлення аперацыйнай сістэмы.
Як адзначаецца, Opera 61 можна спампаваць па спасылцы. Затым, пасля ўстаноўкі, можна перайсці ў Параметры > Персаналізацыя > Колеры ў аперацыйнай сістэме і "пагуляць" з наладамі афармлення.
Змена тэмы ў Opera закранае ўсе элементы: ад стартавай старонкі да мэнэджара закладак і гісторыі. Як чакаецца, Opera 60 выйдзе ў гэтым месяцы, а Opera 61 – бліжэй да лета. У цэлым такі падыход цалкам апраўданы. Не выключана, што яго возьмуць на ўзбраенне і іншыя распрацоўшчыкі.
Крыніца: 3dnews.ru