Нямецкае выдавецтва Alex Springer рыхтуе пазоў да кампаніі Eyeo GmbH, якая распрацоўвае папулярны блакавальнік інтэрнэт-рэкламы Adblock Plus, за парушэнне аўтарскіх правоў. Па словах кампаніі, якой належаць Bild і Die Welt, блакавальнікі рэкламы ставяць пад пагрозу лічбавую журналістыку і незаконна "мяняюць праграмны код сайтаў".
Не ўзнікае сумненняў у тым, што без даходаў, якія атрымліваюцца ад рэкламы, Інтэрнэт быў бы зусім не такім, як яго ведаем мы з вамі. Шмат якія сайты існуюць толькі за кошт грошай, якія яны атрымліваюць ад інтэрнэт-рэкламы. Тым не менш многія з іх злоўжываюць гэтай крыніцай даходу, літаральна бамбардзіруючы наведвальнікаў аніміраванымі банэрамі і ўсплываючымі вокнамі.
На шчасце, у адказ на гэтую з'яву з'явілася мноства пашырэнняў і праграм, якія могуць блакаваць раздражняльную рэкламу, пры гэтым эканомячы трафік карыстачоў і скарачаючы час загрузкі вэб-старонак. Самыя папулярныя з падобных інструментаў – uBlock Origin, AdGuard і AdBlock Plus. І калі карыстачы задаволены наяўнасцю такіх рашэнняў, то розныя сеткавыя пляцоўкі даўно шукаюць спосабы барацьбы з блакавальнікамі пры дапамозе ўсплывальных вокнаў з просьбай адключыць іх ці нават праз суд.
Менавіта апошні спосаб выбрала выдавецтва Alex Springer. Кампанія заявіла, што AdBlock Plus і яго карыстачы падрываюць яе бізнэс-мадэль. Аднак, прайшоўшы праз усе інстанцыі нямецкіх судовых органаў аж да Вярхоўнага суда Германіі, у красавіку 2018 года выдавецтва канчаткова прайграла судовую цяжбу.
Цяпер, праз год, выдавецтва вярнулася з новым абвінавачаннем. На гэты раз Alex Springer сцвярджае, што AdBlock Plus парушае аўтарскія правы. Абвінавачанне, аб якім паведаміў партал навін Heise.de, падобна, рассоўвае межы таго, што звычайна лічыцца парушэннем аўтарскіх правоў у Інтэрнэце.
«Блакавальнікі рэкламы змяняюць праграмны код вэб-сайтаў і, такім чынам, атрымліваюць прамы доступ да ахоўных законам матэрыялаў выдаўцоў, – кажа Клаас-Хендрык Соерынг, кіраўнік юрыдычнага аддзела ў Axel Springer. — У доўгатэрміновай перспектыве яны не толькі разбураць падмурак фінансавання лічбавай журналістыкі, але і паставяць пад пагрозу адкрыты доступ да інфармацыі для фармавання грамадскай думкі ў Інтэрнэце».
Пакуль фактычнае абвінавачанне не стала агульнадаступным (згодна з Heise, яно яшчэ не апрацавана), пра дакладны змест іску можна толькі здагадвацца. Аднак, улічваючы тое, як працуе AdBlock Plus, малаверагодна, што пашырэнне для браўзэра можа нейкім чынам змяніць код вэб-старонкі на выдаленым серверы. І нават калі казаць аб лакальнай машыне, то плягін толькі блакуе загрузку асобных элементаў старонкі, ніяк не змяняючы і не падмяняючы яе змест.
«Аргумент на карысць таго, што мы ўмешваемся ў «праграмны код сайтаў», я б хацеў назваць амаль абсурдным, - заявіў прадстаўнік Eyeo. — Не патрабуецца вялікіх тэхнічных спазнанняў, каб зразумець, што плягін на боку браўзэра не можа нічога змяніць на серверах Springer».
Не выключана, што Alex Springer можа паспрабаваць дзейнічаць у адпаведнасці з іншым аспектам закона аб аўтарскім праве, такім, як абыход тэхнічных мер, зробленых уладальнікам аўтарскага права, каб абмежаваць дзеянні, якія ён не санкцыянаваў. Поўныя дэталі іску і будучага судовага разбору стануць відавочнымі толькі тады, калі пазоў стане даступным для ўсеагульнага азнаямлення.
Крыніца: 3dnews.ru