Некаторы час таму стала вядома аб рэпазітары 996.ICU, куды кітайскія і не толькі распрацоўшчыкі збіралі інфармацыю аб тым, як ім даводзіцца працаваць звышурочна. І калі ў іншых краінах працадаўцы асабліва не звяртаюць на гэта ўвагі, то ў Кітаі ўжо была рэакцыя. Самае цікавае - не ад урада, а ад тэхналагічных гігантаў.
Выданне The Verge паведамляе, што шэраг кампаній, у ліку якіх Tencent, Alibaba, Xiaomi і Qihoo 360, блакуюць доступ да рэпазітара на ўзроўні браўзэраў. Дарэчы, гэтыя кампаніі раней абвінавачваліся ў дрэнным стаўленні да супрацоўнікаў.
Пры спробе адкрыць патрэбны адрас выводзіцца паведамленне: «На вэб-сайце, які вы зараз наведваеце, ёсць незаконная інфармацыя. Калі ласка, закрыйце старонку». Пра тое, чаму гэтая інфармацыя раптам стала незаконнай - не паведамляецца.
Пры гэтым праблема праяўляецца пераважна на кітайскіх браўзэрах. Мяркуецца (хаця пакуль гэта і не даказана), што выкарыстанне міжнародных версій можа дапамагчы. Пры гэтым ні адна кампанія пакуль не адказала на запыт The Verge аб сітуацыі. А карыстачы ў Кітаі мяркуюць, што ўся справа ў ініцыятыве асобных карпарацый, паколькі блакуецца строга адзін рэпазітар, а не ўвесь сэрвіс. Пры гэтым цікава, што ў адных карыстачоў фірмовыя браўзэры Xiaomi і 360 Browser блакуюць доступ да 996.ICU, у іншых – не. Верагодна, гэта таксама залежыць ад геаграфічнага становішча карыстальніка.
Сара Кук (Sarah Cook), старэйшы аналітык Freedom House па Усходняй Азіі, мяркуе, што такое выбарачнае блакаванне можа быць спосабам вырашыць праблему "малой крывёй", бо GitHub шырока выкарыстоўваецца праграмістамі ў Кітаі па прафесійных прычынах. Інакш кажучы, гэта спроба не перашкаджаць IT-гігантам і іх бізнэсу, але пры гэтым забяспечваць выкананне палітычных забарон.
Крыніца: 3dnews.ru