Штогадовая канферэнцыя для праграмістаў і распрацоўшчыкаў Microsoft Build стала ахвярай каранавіруса: у традыцыйным фармаце мерапрыемства ў гэтым годзе праводзіцца не будзе.
Першая канферэнцыя Microsoft Build была арганізавана ў 2011 годзе. З тых часоў гэтае мерапрыемства праходзіла штогод у розных гарадах у Злучаных Штатах, уключаючы Сан-Францыска (Каліфорнія) і Сіэтл (Вашынгтон). У канферэнцыі традыцыйна бралі ўдзел тысячы вэб-распрацоўшчыкаў і спецыялістаў у галіне праграмнага забеспячэння.
Чакалася, што сёлета імпрэза пройдзе ў Сіэтле з 19 па 21 траўня. Аднак з-за ўспышкі новага каранавіруса, які забраў жыцці ўжо прыкладна 5 тыс. чалавек па ўсім свеце, карпарацыя Microsoft памяняла планы.
«Бяспека нашай супольнасці з'яўляецца найвышэйшым прыярытэтам. У святле рэкамендацый уладаў штата Вашынгтон па ахове здароўя мы вырашылі перавесці штогадовае мерапрыемства для распрацоўшчыкаў Microsoft Build у лічбавы фармат», – гаворыцца ў паведамленні рэдмандскага гіганта.
Іншымі словамі, канферэнцыя пройдзе ў віртуальнай прасторы. Гэта дазволіць пазбегнуць вялікай колькасці людзей, звязанага з рызыкай далейшага распаўсюджвання захворвання.
Крыніца: 3dnews.ru