Адкрыта рэгістрацыя на 16-ю Linux Vacation / Eastern Europe. У гэтым годзе канферэнцыя пройдзе 27-30 жніўня у рэжыме анлайн і зойме чатыры няпоўныя дні. Удзел у анлайн-версіі LVEE 2020 бясплатны.
З 2005 года LVEE штогод прыцягвае ўдзельнікаў з Беларусі, Расіі, Украіны, Еўрапейскага Саюза і іншых краін. У тэматыку дакладаў традыцыйна ўваходзіць распрацоўка і суправаджэнне свабоднага ПЗ (не абмяжоўваючыся платформай GNU/Linux), укараненне і адміністраванне рашэнняў на аснове свабодных тэхналогій, асаблівасці выкарыстання свабодных ліцэнзій. Канферэнцыя ахоплівае шырокае кола платформаў - ад працоўных станцый і сервераў да ўбудаваных сістэм і мабільных прылад.
Прымаюцца прапановы дакладаў і лайтнінгаў. Каб падаць заяўку на ўдзел, трэба зарэгістравацца на сайце канферэнцыі https://lvee.org. Пасля рэгістрацыі ўдзельнік атрымлівае доступ да анлайн-сістэмы рэцэнзавання тэзісаў, дзе можна падаць заяўку на даклад да 24 жніўня 2020 года. Усе тэзісы дакладаў праходзяць рэцэнзаванне. Лайтнінгі (бліц-даклады) не патрабуюць папярэдняй заяўкі і рэгіструюцца ў дзень сесіі бліц-дакладаў.
Крыніца: linux.org.ru