У мінулым годзе на адкрыцці Computex кампанія Intel прадэманстравала HEDT-працэсар, усе ядры якога працавалі на частаце 5 Ггц. А сёння гэта стала рэальнасцю ў масавай платформе – Intel папярэдне анансавала LGA 1151v2-працэсар, які абяцае такую ж частату ў любым сцэнары. Новы Core i9-9900KS – гэта 8-ядзерны чып, які можа працаваць на частаце 5 Ггц стала: як падчас аднаядзерных, так і ў выпадку шматструменных працоўных нагрузак.
Згаданая леташняя дэманстрацыя была прысвечана разагнанаму 28-ядзернаму працэсару Xeon, але насамрэч яго рэальная частата апынулася нашмат ніжэй. Гэта выклікала шмат спрэчак, бо Intel не згадала, што для дасягнення выніку яна выкарыстоўвала астуджальную вадкасць з мінусовай тэмпературай. Аднак на гэты раз мы атрымалі нешта больш рэалістычнае. Новы Core i9-9900KS выкарыстоўвае той жа крышталь, што ўжываецца ў сучасным i9-9900K, але гаворка ідзе аб адабраных чыпах, здольных працаваць на частаце ў 5 Ггц увесь час пры любой нагрузцы.
Тэхнічна працэсар мае базавую частату 4 Ггц, аднак ён будзе працаваць у такім эканомным рэжыме толькі на стандартных наладах BIOS па змаўчанні (пры гэтым ніводны спажывецкі поплатак не выкарыстае базавыя перадусталёўкі BIOS). Новы працэсар будзе сумяшчальны з тымі ж поплаткамі, што і Core i9-9900K, але запатрабуе невялікае абнаўленне прашыўкі. Нарэшце, варта згадаць, што чып мае тую ж убудаваную графіку UHD Graphics 630, што і Core i9-9900K.
Intel яшчэ не паведаміла публіцы паказчыкі TDP, як няма пакуль інфармацыі аб кошце і даце пачатку продажаў. Аднак старэйшы віцэ-прэзідэнт кампаніі Грэгары Брайант (Gregory Bryant) праз пару дзён правядзе ў рамках Computex прэзентацыю, і, верагодна, тады мы даведаемся ўжо ўсе падрабязнасці.
Асноўнае адрозненне навінкі ад Core i9-9900K складаецца ў тым, што ва ўсіх ядраў Core i9-9900KS частата ў рэжыме Turbo роўная 5 Ггц, гэта значыць павялічана на 300 Мгц. Існуе невялікая верагоднасць таго, што Intel магла павысіць і TDP, асабліва ўлічваючы, што базавая частата (на аснове якой і вылічаецца TDP) павялічылася больш чым на 10% – з 3,6 Ггц да 4 Ггц.
Дарэчы, у гэты раз Intel паказала журналістам "сумленную" дэманстрацыйную сістэму, у якой выкарыстоўвалася стандартны матчыны поплатак і сістэма вадкага астуджэння з замкнёным контурам. Кампанія пацвердзіла, што ў чыпе выкарыстоўваецца прыпой.
Крыніца: 3dnews.ru