«Зоркаскок» з адарванай ветрам вежай здзейсніў свой першы скачок з рухавіком Raptor, аб чым з радасцю паведаміў у стужцы Twitter кіраўнік кампаніі SpaceX Ілон Маск. Конус у прататыпа адарвала падчас ураганнага ветру яшчэ ў студзені. Для выпрабавальнага скачка было вырашана яго не аднаўляць. Да таго ж Starhopper, як назвалі прататып будучай звышцяжкай ракеты Starship, створаны для выпрабавання рухавіка Raptor на субарбітальных вышынях, быў прывязаны да зямлі, каб пазбегнуць некантралюемага палёту ў непрадказальным кірунку. Як вы разумееце, аэрадынаміка ў ракеты без абцякальніка пакідае жадаць лепшага.
Зрэшты, у дадзеным выпадку гэта не важна. Прататып запаліў рухавікі і адарваўся ад зямлі. «Усе сістэмы «зялёныя», - далажыў Маск. Інакш кажучы, скачок прайшоў як мае быць, і сістэмы запуску і працы былі ў норме. Гэта было першае на базе SpaceX у Тэхасе натурнае выпрабаванне прататыпа, падобнага на ракету. Выпрабаванні прайшлі прыкладна ў 4 раніцы па маскоўскім часе. Маск не стаў дзяліцца падрабязнасцямі, але мяркуецца, што прататып быў абсталяваны другім з падрыхтаваных для выпрабаванняў рухавіком Raptor. Ракета Starship для перавозкі 100 астранаўтаў да Месяца ці да Марса будзе ўзброена 7 такімі рухавікамі.
Таксама нагадаем, што Starship і яе прататып Starhopper вырашана вырабляць не з кампазітных матэрыялаў, а са сталі. У свой час мы паведамлялі, чаму кампанія прыйшла да гэтага матэрыялу. Ракета Starhopper павінна пацвердзіць ці абвергнуць правільнасць выбару. Гэты прататып мае дыяметр 9 метраў і вышыню (з абцякальнікам) 39 метраў. Ён нясе адзін рухавік Raptor і абяцае дапамагчы не толькі ў адпрацоўцы тэхналогій для праекту Starship, але таксама ў развіцці касмічнага турызму.
Крыніца: 3dnews.ru