Улады Вялікабрытаніі папярэдзілі, што разгортванне бесправадных сетак 5G у Вялікабрытаніі можа быць адтэрмінавана, калі будуць накладзены абмежаванні на выкарыстанне абсталявання кітайскага тэлекамунікацыйнага гіганта Huawei.
"Разгортванне сетак 5G у Вялікабрытаніі можа быць адтэрмінавана ў сувязі з неабходнасцю прыняцця належных мер па забеспячэнні бяспекі", – заявіў Джэрэмі Райт (Jeremy Wright, на фота вышэй), міністр лічбавых тэхналогій, культуры, СМІ і спорту, дадаўшы, што ён не пагадзіўся б у пагоні за эканамічнай выгадай ад выкарыстання таннага абсталявання пайсці на рызыкі для бяспекі.
«Вядома, існуе верагоднасць затрымкі ў працэсе разгортвання 5G: калі вы захочаце запусціць 5G хутчэй, вы зробіце гэта без уліку бяспекі, - заявіў ён заканадаўцам на пасяджэнні парламенцкага камітэта. - Але мы не гатовы пайсці на гэта. Таму я не выключаю, што будзе некаторая затрымка».
Huawei з'яўляецца лідарам рынку інфраструктуры для сетак 5G, але шэраг краін выказвае апасенні ў сувязі з магчымым супрацоўніцтвам кампаніі з урадавымі арганізацыямі КНР. ЗША пастаянна папярэджваюць сваіх саюзнікаў аб праблемах з бяспекай, звязаных з выкарыстаннем тэхналогій Huawei, а ўрад Аўстраліі ў жніўні мінулага года вынес забарону на ўдзел кітайскай кампаніі ў разгортванні сетак 5G у краіне.
У сваю чаргу, Huawei ужо неаднаразова выступала з абвяржэннем падобных абвінавачанняў, падкрэсліваючы, што ўсе яе актывы належаць калектыву кампаніі, а не ўраду КНР.
Крыніца: 3dnews.ru