Кіраўнік дзяржаўнай карпарацыі Раскосмас Дзмітрый Рагозін паведаміў аб тым, што выканаць план па запуску ракет-носьбітаў у бягучым годзе не ўдасца.
Раней, як адзначае ТАСС, меркавалася, што ў 2019-м будуць зроблены 45 пускаў. Пры гэтым улічваюцца як запускі ракет касмічнага прызначэння, так і выпрабавальныя пускі балістычных ракет.
Аднак зараз гаворыцца, што па выніках гэтага года ўдасца ажыццявіць каля 40 стартаў. «45 дакладна не будзе, таму што ў нас тры апараты «з'ехалі» на наступны год. Гэта не нашыя апараты, а апараты нашых замежных партнёраў. Яны іх не паспелі зрабіць. Яны «з'язджаюць» на 2020 год», - сказаў спадар Рагозін на сустрэчы са студэнтамі Балтыйскага дзяржаўнага тэхнічнага ўніверсітэта «Ваенмех» ім. Д. Ф. Усцінава ў Пецярбургу.
Падкрэсліваецца, што названыя лічбы ўлічваюць і баявыя запускі. На сённяшні дзень ажыццёўлена 18 такіх стартаў.
Між тым ужо 25 верасня павінен адбыцца старт ракеты-носьбіта "Саюз-ФГ" з пілатуемым караблём "Саюз МС-15" па праграме Міжнароднай касмічнай станцыі (МКС). На арбіту адправіцца чарговая працяглая экспедыцыя. У склад асноўнага экіпажа ўваходзяць касманаўт Алег Скрыпачка, астранаўт Джэсіка Мэір і ўдзельнік касмічнага палёту ад ААЭ Хаззаа Аль Мансуры. Іх дублёры - касманаўт Сяргей Рыжыкаў, астранаўт Томас Маршберн і ўдзельнік касмічнага палёту Султан Аль Неядзі.
Крыніца: 3dnews.ru