17 верасня 2019 года ў Санкт-Пецярбургу былі падпісаны два пагадненні аб супрацоўніцтве паміж Расіяй і Кітаем у сферы даследавання Месяца. Пра гэта паведамляе дзяржаўная карпарацыя па касмічнай дзейнасці Раскосмас.
Адзін з дакументаў прадугледжвае стварэнне і выкарыстанне аб'яднанага Цэнтра даных па даследаванні Месяца і далёкага космасу. Гэта пляцоўка будзе ўяўляць сабой геаграфічна размеркаваную інфармацыйную сістэму з размяшчэннем двух асноўных вузлоў, адзін з якіх будзе размешчаны на тэрыторыі Расійскай Федэрацыі, а другі - на тэрыторыі Кітайскай Народнай Рэспублікі.
У перспектыве бакі маюць намер прыцягваць профільныя нацыянальныя арганізацыі і ўстановы з мэтай пашырэння функцыянальнасці цэнтра. Новая пляцоўка дапаможа павысіць эфектыўнасць даследавання натуральнага спадарожніка нашай планеты.
Другое пагадненне датычыцца супрацоўніцтва ў рамках каардынацыі расійскай місіі з арбітальным касмічным апаратам "Луна-Рэсурс-1" і кітайскай місіі даследавання палярнай вобласці Месяца "Чан'э-7". Чакаецца, што расейскі зонд дапаможа абраць месцы для пасадкі будучых кітайскіх апаратаў.
Акрамя таго, будуць праведзены выпрабаванні па рэтрансляцыі даных паміж расійскім апаратам "Луна-Рэсурс-1" і касмічнымі модулямі кітайскай місіі "Чан'э-7".
Дадамо, што пагадненні падпісалі кіраўнік Раскосмасу Дзмітрый Рагозін і кіраўнік Кітайскай нацыянальнай касмічнай адміністрацыі Чжан Кэцян.
Крыніца: 3dnews.ru