Сусветная арганізацыя інтэлектуальнай уласнасці (World Intellectual Property Organization, WIPO), па паведамленні рэсурсу LetsGoDigital, рассакрэціла патэнтную дакументацыю Sony на новыя прадукты з гнуткім дысплеем.
На гэты раз гаворка ідзе не пра складаныя смартфоны, а пра заплечнікі і сумкі з інтэграваным гнуткім экранам. Такая панэль, па задумцы Sony, будзе вырабляцца па тэхналогіі электроннай паперы, што забяспечыць невялікае энергаспажыванне і добрую чытальнасць выявы.
Прапанаванае рашэнне прадугледжвае наяўнасць акумулятарнай батарэі, кантролера і спецыяльнага перамыкача. Апошні дазволіць мяняць рэжымы працы дысплея, а таксама дэманстраваць тыя ці іншыя карцінкі.
Цікаўна, што Sony таксама прапануе дапоўніць сістэму акселерометрам і тэмпературным датчыкам. Гэта дазволіць аўтаматычна перамыкаць малюнак у залежнасці ад бягучых навакольных умоў і дзеянняў карыстальніка.
Заяўка на патэнт была пададзена японскай карпарацыяй яшчэ ў 2017 годзе, але абнародавана дакументацыя толькі зараз. Аб тым, калі падобныя заплечнікі і кайстры могуць з'явіцца на камерцыйным рынку, нажаль, нічога не паведамляецца.
Крыніца: 3dnews.ru