Кампанія Intellivision Entertainment анансавала працяг знакамітай прыгоды Earthworm Jim, якой у гэтым годзе спаўняецца 25 гадоў. Над новым праектам працуе каманда, якая прыклала руку да арыгінальных гульняў. Рэліз запланаваны эксклюзіўна на будучай кансолі Intellivision Amico.
Як паведамляецца ў прэс-рэлізе, праграмісты, мастакі, гукарэжысёры і дызайнеры ўзроўняў з арыгінальнай каманды вяртаюцца для таго, каб стварыць новую частку Earthworm Jim і пры гэтым захаваць унікальнасць і гумар серыі.
«Мы казалі пра гэты момант ужо шмат гадоў. Сабраць усю каманду разам – гэта мара, якая стала явай», – сказаў Томі Таларыка (Tommy Tallarico), генеральны дырэктар і прэзідэнт Intellivision Entertainment, а таксама кампазітар і дызайнер гуку першых двух частак Earthworm Jim.
Intellivision Amico – гэта анансаваная ў кастрычніку 2018 года кансоль. Кампанія хоча адрадзіць і выпусціць сістэму, арыентаваную на гульню ў коле сям'і. Выхад прызначаны на 10 кастрычніка 2020 года.