Laŭ publikaĵo de la Financial Times, ekde la pasinta aŭtuno, estroj de usonaj spionaj agentejoj informas la estrojn de teknologiaj kompanioj en Silicon Valley pri la eblaj danĝeroj de komercado en Ĉinio.
Iliaj informkunvenoj inkludis avertojn pri la minaco de ciberatakoj kaj ŝtelo de intelekta proprieto. Renkontiĝoj pri la afero okazis kun diversaj grupoj, kiuj inkludis teknologiajn kompaniojn, universitatojn kaj riskkapitalistojn el Kalifornio kaj Vaŝingtono.
La renkontiĝoj estas la plej novaj ekzemploj de la ĉiam pli agresema sinteno de la usona registaro al Ĉinio. En deklaro donita al la Financial Times, respublikana senatano Marco Rubio, unu el la politikistoj kiuj organizis la informkunvenojn, skizis ilian celon.
"La ĉina registaro kaj Komunista Partio prezentas la plej grandan longdaŭran minacon al usona ekonomia kaj nacia sekureco," diris Rubio. "Estas grave, ke usonaj kompanioj, universitatoj kaj komercaj organizoj plene komprenu ĉi tion."
Laŭ la Financial Times, la informkunvenoj komenciĝis en oktobro pasintjare. Al ili ĉeestis altrangaj membroj de la usona spionkomunumo, kiel Dan Coats, usona Direktoro de Nacia Inteligenteco. Dum la renkontiĝoj, konfidencaj informoj estis interŝanĝitaj, kio estas nekutima nivelo de malkaŝo de tiaj informoj por spionservoj.
Ekde tiam, okazis serioza eskalado en la komerca milito inter Usono kaj Ĉinio.
fonto: 3dnews.ru