Ինքնաթիռներ արտադրող Airbus ընկերությունը մինչև 2030 թվականը կարող է այնպիսի ինքնաթիռ մշակել, որը վնասակար ազդեցություն չի ունենա շրջակա միջավայրի վրա, գրում է Bloomberg-ը՝ վկայակոչելով Airbus ExO Alpha-ի (նոր տեխնոլոգիաների մշակման մեջ մասնագիտացած Airbus դուստր ձեռնարկություն) գործադիր տնօրեն Սանդրա Շեֆերին։ Թոփ մենեջերի խոսքով՝ 100 մարդ տարողությամբ էկոլոգիապես մաքուր ինքնաթիռը կարող է օգտագործվել տարածաշրջանային ուղեւորափոխադրումների համար։
Airbus-ը Boeing-ի և այլ խոշոր ավիաընկերությունների հետ միասին խոստացել է մինչև 2050 թվականը կրկնակի կրճատել ածխածնի արտանետումները: «Այսօր պարտավորությունների կատարման միասնական լուծում չկա, բայց կան մի շարք լուծումներ, որոնք կաշխատեն, եթե դրանք միասին հավաքենք», - ասել է Շեֆերը:
Սանդրա Շեֆերն ասել է, որ ընկերությունը ներկայումս ուսումնասիրում է օդանավում այլընտրանքային վառելիքի օգտագործման հնարավորությունը՝ ածխաթթու գազի արտանետումները նվազեցնելու համար, ինչպես նաև աշխատում է ավելի խնայող շարժիչներ ստեղծելու և աերոդինամիկ բնութագրերի բարելավման վրա։
Թեև կարող է երկար ժամանակ պահանջվել էկոլոգիապես մաքուր խոշոր ինքնաթիռներ ստեղծելու համար, Airbus ExO Alpha-ի գործադիր տնօրենը կարծում է, որ տարածաշրջանային տրանսպորտի համար էկոլոգիապես մաքուր փոքր ինքնաթիռներ կարող են արտադրվել մինչև 2030 թվականը:
Source: 3dnews.ru