Եվրամիությունը հատուկ մեխանիզմ է ստեղծել, որը կօգտագործվի խոշոր կիբեր հարձակումներին ի պատասխան պատժամիջոցներ կիրառելու համար։ Պատժամիջոցների քաղաքականությունը կարող է կիրառվել կիբերհարձակումների մեջ ներգրավված անձանց, ինչպես նաև հաքերային խմբերին հովանավորող կամ տեխնիկական աջակցություն ցուցաբերող կողմերի նկատմամբ: Համապատասխան մարմինների որոշմամբ կմտցվեն սահմանափակող միջոցներ՝ Եվրամիության տարածք մուտքի արգելքի և ֆինանսական սառեցման տեսքով։ Այս մոտեցումը պետք է արագացնի անդամ երկրների արձագանքը հաքերային հարձակումներին:
Մեծ Բրիտանիայի արտաքին գործերի նախարար Ջերեմի Հանթը այդ քայլն անվանել է «վճռական գործողություն»: Նրա կարծիքով, «թշնամական դերակատարները» չափազանց երկար են սպառնում Եվրամիության անվտանգությանը, ոչնչացնում են կարևոր ենթակառուցվածքները, փորձում են գողանալ առևտրային գաղտնիքները և փորձում են խարխլել հիմնական ժողովրդավարական սկզբունքները։ Հատկանշական է, որ պատժամիջոցները կարող են կիրառվել ոչ միայն հաքերային հարձակում հայտնաբերելու, այլ նաև նման գործողություն իրականացնելու փորձի դեպքում։
Եվրոպական մի շարք երկրների տվյալներով՝ Ռուսաստանը և Չինաստանը պարբերաբար կիբերհարձակումներ են իրականացնում Եվրամիության տարածքում գտնվող օբյեկտների վրա։ Եվրոպացի առաջնորդները մտահոգված են, որ Ռուսաստանը ազդում է Միության խորհրդարանական ընտրությունների վրա, որոնք կանցկացվեն մայիսի 23-ից 26-ը։ Խորհրդարանական ընտրությունները կլինեն առաջինը այն բանից հետո, երբ Ռուսաստանին մեղադրեցին ԱՄՆ նախագահական ընտրություններին միջամտելու մեջ։ Ոչ վաղ անցյալում Fireeye-ը հայտարարեց, որ ռուս հաքերները թիրախավորել են եվրոպական պետական կառույցները, ինչպես նաև Գերմանիայում և Ֆրանսիայում լրատվամիջոցները:
Source: 3dnews.ru