Առցանց աղբյուրները հայտնում են, որ Եվրամիության խորհուրդը հավանություն է տվել համացանցում հեղինակային իրավունքի կանոնների խստացմանը։ Համաձայն այս հրահանգի՝ կայքերի սեփականատերերը, որոնցում տեղադրվում է օգտատերերի կողմից ստեղծված բովանդակություն, պետք է պայմանագիր կնքեն հեղինակների հետ։ Աշխատանքների օգտագործման պայմանագիրը նաև ենթադրում է, որ առցանց հարթակները պետք է դրամական փոխհատուցում վճարեն բովանդակության մասնակի պատճենման համար։ Կայքի սեփականատերերը պատասխանատու են օգտատերերի կողմից հրապարակված նյութերի բովանդակության համար:
Նախագիծը քննարկման էր ներկայացվել անցյալ ամիս, սակայն քննադատության արժանացավ ու մերժվեց։ Օրենքի հեղինակները մի շարք փոփոխություններ են կատարել դրանում, որոշ մասեր վերաձեւակերպել ու վերանայման են ներկայացրել։ Փաստաթղթի վերջնական տարբերակը թույլ է տալիս հեղինակային իրավունքով պաշտպանված որոշ բովանդակություն տեղադրել կայքերում: Օրինակ՝ դա կարելի է անել՝ ակնարկներ գրելու, աղբյուրը մեջբերելու կամ պարոդիա ստեղծելու համար։ Դեռևս պարզ չէ, թե ինչպես է նման բովանդակությունը ճանաչվելու զտիչներով, որոնց օգտագործումն այժմ պարտադիր է Եվրամիությունում ծառայություններ մատուցող պրովայդերների համար։ Հրահանգը չի տարածվի ոչ առևտրային հրապարակումներ ունեցող կայքերի վրա: Օգտատերերը կկարողանան օգտագործել մշակութային ժառանգության մաս ճանաչված նյութերը, նույնիսկ եթե դրանք պաշտպանված են հեղինակային իրավունքով:
Եթե բովանդակությունը տեղադրվում է ցանկացած ինտերնետային հարթակում՝ առանց հեղինակների հետ պայմանագիր կնքելու, ապա ռեսուրսը հեղինակային իրավունքի խախտման դեպքում կենթարկվի օրենքով նախատեսված պատժի։ Նախևառաջ, հրապարակման կանոնների փոփոխությունները կազդեն այնպիսի խոշոր հարթակների վրա, ինչպիսիք են YouTube-ը կամ Facebook-ը, որոնք պետք է ոչ միայն պայմանագրեր կնքեն բովանդակության հեղինակների հետ և նրանց տրամադրեն շահույթի մի մասը, այլև ստուգեն նյութերը՝ օգտագործելով հատուկ զտիչներ:
Source: 3dnews.ru