Facebook-ի ներկայացուցիչները հայտարարել են հետաքննություն, որի արդյունքում արգելափակվել են հարյուրավոր կեղծ հաշիվներ ԱՄՆ-ից, Վիետնամից և Վրաստանից, որոնք օգտագործվել են որպես լայնածավալ արշավների մաս՝ Facebook և Instagram սոցիալական ցանցերում հասարակական կարծիքը շահարկելու համար։
Նշվում է, որ այս աքաունթներում օգտագործվել են արհեստական ինտելեկտի տեխնոլոգիաների կիրառմամբ ստեղծված լուսանկարներ, որոնք չափազանց դժվարացրել են անզեն աչքով խաբեության ճանաչումը։ Այս մասին հայտնել է Facebook-ի կիբերանվտանգության բաժնի ղեկավար Նաթանիել Գլեյչերը։
Ընդհանուր առմամբ արգելափակվել է Facebook սոցիալական ցանցի 610 հաշիվ, 89 էջ և 156 խումբ, ինչպես նաև Instagram-ի 72 հաշիվ։ Facebook-ի ադմինիստրացիան արգելափակված հաշիվների մեծ մասը կապում է Epoch Media Group-ի հետ, որը հրատարակում է The Epoch Times պահպանողական հրատարակությունը։
Նշվում է, որ արշավի շրջանակներում սոցիալական ցանցերում գովազդի վրա ծախսվել է մոտ 9 մլն դոլար, կեղծ աքաունթների միջոցով տեղադրված բովանդակությունը հիմնականում նախատեսված է եղել ԱՄՆ-ից և Վիետնամից օգտատերերի համար։
Բացի այդ, մշակողները հայտնաբերել և արգելափակել են Վրաստանում կեղծ հաշիվների բավականին մեծ ցանց: Այն ներառում էր 39 հաշիվ և ավելի քան 300 էջ։ Ենթադրվում է, որ այս ցանցը կապված է Վրաստանի կառավարության հետ, և դրա նպատակը եղել է դրական կարծիք ձևավորել ներկայիս իշխանության մասին և քննադատել ընդդիմադիր կուսակցություններին։
Facebook-ն ասում է, որ կեղծ աքաունթների հայտնաբերումը ցույց է տալիս, թե ինչպես են զարգանում ապատեղեկատվության և հանրային կարծիքը շահարկելու համար օգտագործվող գործիքները: Կեղծ պրոֆիլների լուսանկարները ստեղծվել են մեքենայական ուսուցմամբ նեյրոնային ցանցերի վրա հիմնված ալգորիթմների միջոցով: Այնուամենայնիվ, Facebook-ի ներկայացուցիչը նշել է, որ այս կերպ ստեղծված լուսանկարները չեն խանգարում ընկերության ավտոմատացված համակարգերին բացահայտել կեղծ հաշիվները, քանի որ այս գործընթացը հիմնված է հաշվի վարքագծի վերլուծության վրա:
Source: 3dnews.ru