Հայտնի է դարձել, որ Facebook-ը չի թողարկի սեփական կրիպտոարժույթը՝ Libra-ն, քանի դեռ ամերիկյան կարգավորող մարմիններից չեն ստացել անհրաժեշտ հավանությունները։ Այս մասին ընկերության ղեկավար Մարկ Ցուկերբերգը հայտարարել է ԱՄՆ Կոնգրեսի Ներկայացուցիչների պալատում այսօր մեկնարկած լսումների բացման գրավոր հայտարարության մեջ։
Նամակում պարոն Ցուկերբերգը հասկացնում է, որ Facebook-ը մտադիր չէ գործարկել կրիպտոարժույթ՝ շրջանցելով գործող կանոնները։ Նա ընդգծել է, որ աշխարհի ցանկացած կետում Libra վճարային համակարգի գործարկումը տեղի չի ունենա այնքան ժամանակ, քանի դեռ բոլոր ամերիկյան կարգավորիչները չեն հաստատել այն։ Ընկերությունը կաջակցի Libra-ի գործարկումը հետաձգելուն այնքան ժամանակ, մինչև չլուծվեն ԱՄՆ կարգավորիչների մտահոգությունների հետ կապված բոլոր խնդիրները:
Հայտարարության մեջ նշվում է նաև, որ նորարարական նախագծերից հրաժարվելը հանգեցնում է ռիսկերի, որոնք, ի թիվս այլ բաների, կապված են Չինաստանի հետ։ «Մինչ մենք քննարկում ենք այս հարցերը, մնացած աշխարհը չի սպասում: Չինաստանն արագորեն շարժվում է նմանատիպ գաղափարներ սկսելու համար առաջիկա ամիսներին»,- ասել է Ցուկերբերգը: Ասվել է նաեւ, որ նախագծի կառավարումը կվստահվի հատուկ ստեղծված կազմակերպությանը՝ Libra Association-ին, որը ներառում է ավելի քան 20 ընկերություն։ Միաժամանակ Facebook-ը չի վերահսկի Libra Association-ի գործունեությունը։
Հիշեցնենք, որ Facebook-ը նոր կրիպտոարժույթ գործարկելու պլանների մասին հայտարարեց 2019 թվականի հունիսին։ Ընկերությունն ասել է, որ Libra թվային արժույթով փոխանցումներ կատարելը նույնքան հեշտ կլինի, որքան «ձեր հեռախոսին տեքստային հաղորդագրություն ուղարկելը»: Ապագա կրիպտոարժույթը հիմնված է բլոկչեյն տեխնոլոգիաների վրա։
Source: 3dnews.ru