Երբ ինչ-որ բան ջնջում եք Instagram-ից, ակնհայտորեն ակնկալում եք, որ այն ընդմիշտ կվերանա: Սակայն իրականում պարզվեց, որ դա այդպես չէ։ ՏՏ անվտանգության հետազոտող Սաուգաթ Փոխարելին հաջողվել է ձեռք բերել իր լուսանկարների և գրառումների պատճենները, որոնք ջնջվել են Instagram-ից ավելի քան մեկ տարի առաջ։ Սա ցույց է տալիս, որ օգտատերերի կողմից ջնջված տեղեկատվությունը ոչ մի տեղ չի անհետանում սոցցանցի սերվերներից։
Instagram-ը հայտարարել է, որ դա տեղի է ունեցել իր համակարգում առկա սխալի պատճառով, որն այժմ լուծվել է։ Ավելին, հետազոտողն այս սխալը հայտնաբերելու համար ստացել է 6000 դոլար պարգև։ Ըստ տեղեկությունների՝ Փոխարելը խնդիրը հայտնաբերել է 2019 թվականի հոկտեմբերին և այն շտկվել է այս ամսվա սկզբին։
«Մի հետազոտող զեկուցել է մի խնդրի, երբ Instagram-ի որոշ օգտատերերի ջնջված պատկերներն ու գրառումները ներառվել են կրկնօրինակում, եթե նրանք օգտագործել են «Ներբեռնել ձեր տեղեկատվությունը» գործիքը: Մենք շտկել ենք խնդիրը և չենք գտել որևէ ապացույց այն մասին, որ այս սխալը շահագործվել է հարձակվողների կողմից: Շնորհակալություն ենք հայտնում հետազոտողին խնդրի մասին մեզ տեղեկացնելու համար»,- այս հարցը մեկնաբանել է Instagram-ի ներկայացուցիչը։
Անհասկանալի է մնում, թե որքանով է տարածված խնդիրը և արդյոք այն ազդել է Instagram-ի բոլոր օգտատերերի, թե՞ միայն նրանց մի մասի վրա: Սովորաբար, երբ օգտատերը ջնջում է որևէ տեղեկություն առցանց ծառայություններից կամ սոցիալական ցանցերից, որոշ ժամանակ է անցնում, մինչև այն անհետանում է ներքին սերվերներից: Ինչ վերաբերում է Instagram-ին, ապա, ըստ պաշտոնական տվյալների, ջնջված օգտատերերի տվյալները շարունակում են պահպանվել սոցցանցի սերվերներում 90 օր, որից հետո այն ընդմիշտ ջնջվում է։
Source:
Source: 3dnews.ru