Google-ի ֆիրմային թվային բովանդակության խանութը նոր տեսք է ստացել։ Ինչպես Google-ի արտադրանքի վերջին ձևավորումներից շատերը, Play Store-ի նոր տեսքն ունի մեծ քանակությամբ սպիտակ՝ համակցված Google Sans տառատեսակի հետ: Որպես նման փոփոխությունների օրինակ՝ կարելի է հիշել Gmail էլփոստի ծառայության նոր դիզայնը, որը տարեսկզբին նույնպես կորցրեց որոշ վառ տարրեր՝ հօգուտ ավելի զուսպ ու բաց գույների։
Play Store-ի նոր դիզայնը կազմակերպում է խաղեր, հավելվածներ, գրքեր, ինչպես նաև ֆիլմեր և հեռուստաշոուներ իրենց համապատասխան ներդիրներում: Սմարթֆոնի միջոցով խանութի հետ շփվելիս ներդիրները հայտնվում են էկրանի ներքևում, իսկ պլանշետային համակարգիչների դեպքում՝ կողագոտում։ Բացի այդ, ցուցադրվող սրբապատկերների դիզայնը դարձել է ավելի հարթ, ուղղանկյունները ձեռք են բերել կլորացված եզրեր, ինչը ամբողջ խանութին տալիս է ավելի համահունչ տեսք։
Թարմացված Play Store-ը կառաջարկի հավելվածներ՝ հիմնված օգտատերերի նախասիրությունների վրա՝ «Առաջարկվում է ձեզ» բաժնում: Գովազդային առաջարկությունները կցուցադրվեն «Հատուկ ձեզ համար» բաժնում:
Google-ի պաշտոնական տվյալների համաձայն՝ Play Store թվային բովանդակության խանութի նոր դիզայնն այժմ հասանելի է Android սարքերի բոլոր սեփականատերերին։ Հարկ է նշել, որ Play Store-ի թարմացված դիզայնը չունի գիշերային ռեժիմ։ Այնուամենայնիվ, հնարավոր է, որ ապագայում մուգ թեմա ինտեգրվի, քանի որ վերջերս Google-ի շատ ծառայություններ ստացել են գիշերային ռեժիմ։
Source: 3dnews.ru