Ռոսկոսմոս պետական կորպորացիայի մաս կազմող NPO Automation գիտաարտադրական ասոցիացիան ցուցադրել է ինքնակառավարման համակարգով հագեցած տրակտորի նախատիպը։
Անօդաչու մեքենան ներկայացվել է Innoprom-2019 միջազգային արդյունաբերական ցուցահանդեսին, որն այս պահին ընթանում է Եկատերինբուրգում։
Տրակտորը ոչ ղեկ ունի, ոչ էլ ոտնակ։ Ավելին, մեքենան նույնիսկ ավանդական խցիկ չունի։ Ուստի շարժումն իրականացվում է բացառապես ավտոմատ ռեժիմով։
Նախատիպն ի վիճակի է որոշել իր սեփական դիրքը գետնին NPO Automation-ի կողմից մշակված մի քանի համակարգերի կիրառմամբ: Արբանյակային ազդանշանի ուղղման տեխնոլոգիան ապահովում է մինչև 10 սանտիմետր ճշգրտություն:
Շարժման համար պատասխանատու է հատուկ կարգավորիչը, որը արբանյակից ստանում է երթուղի կառուցելու համար անհրաժեշտ տեղեկատվություն և մշակում այն։ Էլեկտրոնային «ուղեղը» ինքնուրույն է որոշումներ կայացնում և ունակ է սովորել աշխատելու ընթացքում՝ կուտակելով գիտելիքներ: Մեքենայի արհեստական ինտելեկտը ապահովում է անվտանգ տեղաշարժը հետագծի երկայնքով օպտիմալ արագությամբ:
Տրակտորը հագեցած է հատուկ տեսախցիկներով, իսկ մեքենայատեսության գործիքները թույլ են տալիս բացահայտել խոչընդոտները և կարգավորել հետագիծը՝ կախված ներկա իրավիճակից։
Տրակտորն այժմ փորձարկում է անցնում։ Այս փուլում շարժման ծրագիրը սահմանվում է օպերատորի կողմից՝ մասնագետը սխեմատիկորեն գծում է երթուղին և վերահսկում առաջադրանքի ճիշտ կատարումը:
Source: 3dnews.ru