Financial Times-ի հրապարակման համաձայն՝ անցյալ տարվա աշնանից ամերիկյան հետախուզական գործակալությունների ղեկավարները Սիլիկոնյան հովտում տեխնոլոգիական ընկերությունների ղեկավարներին տեղեկացնում են Չինաստանում բիզնես վարելու հնարավոր վտանգների մասին։
Նրանց ճեպազրույցները ներառում էին նախազգուշացումներ կիբերհարձակումների սպառնալիքի և մտավոր սեփականության գողության մասին: Այս հարցի շուրջ հանդիպումներ են տեղի ունեցել տարբեր խմբերի հետ, որոնց թվում են եղել տեխնոլոգիական ընկերություններ, համալսարաններ և վենչուրային կապիտալիստներ Կալիֆորնիայից և Վաշինգտոնից:
Հանդիպումները Չինաստանի նկատմամբ ԱՄՆ կառավարության ավելի ու ավելի ագրեսիվ դիրքորոշման վերջին օրինակներն են։ Financial Times-ին տրամադրված հայտարարության մեջ հանրապետական սենատոր Մարկո Ռուբիոն՝ ճեպազրույցները կազմակերպող քաղաքական գործիչներից մեկը, նշել է դրանց նպատակը։
«Չինաստանի կառավարությունը և Կոմունիստական կուսակցությունը ամենամեծ երկարաժամկետ սպառնալիքն են ԱՄՆ-ի տնտեսական և ազգային անվտանգության համար», - ասել է Ռուբիոն: «Կարևոր է, որ ամերիկյան ընկերությունները, համալսարանները և առևտրային կազմակերպությունները լիովին հասկանան դա»:
Ինչպես գրում է Financial Times-ը, ճեպազրույցները սկսվել են անցյալ տարվա հոկտեմբերին: Դրանց մասնակցում էին ԱՄՆ հետախուզական հանրության բարձրաստիճան ներկայացուցիչներ, ինչպես, օրինակ, ԱՄՆ Ազգային հետախուզության տնօրեն Դեն Քոութսը: Հանդիպումների ընթացքում գաղտնի տեղեկություններ են փոխանակվել, ինչը հետախուզական ծառայությունների համար նման տեղեկատվության բացահայտման անսովոր մակարդակ է։
Այդ ժամանակից ի վեր ԱՄՆ-ի և Չինաստանի միջև առևտրային պատերազմի լուրջ սրացում է տեղի ունեցել։
Source: 3dnews.ru