Անցյալ տարի Google-ը փոխեց իր ֆիրմային սմարթֆոնների տեսականին՝ առաջատար Pixel 3 և 3 XL սարքերից հետո թողարկելով դրանց ավելի էժան տարբերակները՝ համապատասխանաբար Pixel 3a և 3a XL: Սպասվում է, որ այս տարի տեխնոլոգիական հսկան կգնա նույն ճանապարհով և կթողարկի Pixel 4a և Pixel 4a XL սմարթֆոնները։
Համացանցում արդեն իսկ շատ արտահոսքեր են եղել առաջիկա սարքերի մասին, սակայն այժմ կան հավաստի տվյալներ այն մասին, թե ինչպիսին կլինի Pixel 4a-ն։ Հրապարակվել են սմարթֆոնի պաշտպանիչ պատյանների մի քանի նկարներ, որոնք հստակ պատկերացում են տալիս սարքի դիզայնի մասին։ Պատկերները համապատասխանում են Pixel 4a-ի լուսանկարներին, որոնք ավելի վաղ հրապարակվել էին համացանցում:
Դատելով նոր ռենդերներից՝ սարքը կունենա էկրանի վերին ձախ անկյունում գտնվող առջևի տեսախցիկի կլոր կտրվածք։ Սմարթֆոնի հետևի մասում տեղադրված կլինի տեսախցիկի քառակուսի մոդուլ, որտեղ կտեղակայվի միայն մեկ ոսպնյակ և LED ֆլեշ։ Բացի այդ, սարքի հետնամասում կլինի մատնահետքի սքաներ։
Սմարթֆոնի ներքևի մասում կտեղակայվի USB Type-C միացք, իսկ վերևում՝ 3,5 մմ ականջակալների խցիկ: Միացման կոճակը և ձայնի ձայնի ստեղները կտեղակայվեն սարքի աջ կողմում:
Google-ը դեռ չի հայտնել, թե երբ կթողարկվեն սմարթֆոնները, այնուամենայնիվ, կարելի է ենթադրել, որ Pixel 4a-ն ու Pixel 4a XL-ը կներկայացվեն մայիսին, ինչպես անցյալ տարվա մոդելները։
Source: 3dnews.ru