Фейсбуктун өкүлдөрү иликтөө жарыялап, анын жыйынтыгында АКШ, Вьетнам жана Грузиянын жүздөгөн фейк аккаунттары жабылган, алар Facebook жана Instagram социалдык тармактарында коомдук пикирди манипуляциялоо үчүн масштабдуу кампаниянын алкагында колдонулган.
Бул аккаунттарда жасалма интеллект технологиялары менен жасалган фотосүрөттөр колдонулганы, бул көз боёмочулук менен алдамчылыкты таанууну абдан кыйындатканы белгиленген. Бул тууралуу Facebookтун киберкоопсуздук бөлүмүнүн башчысы Натаниэль Глейхер билдирди.
Жалпысынан Facebook социалдык тармагындагы 610 аккаунт, 89 баракча жана 156 топ, ошондой эле Instagramдагы 72 аккаунт жабылган. Фейсбуктун администрациясы бөгөттөлгөн аккаунттардын көбүн The Epoch Times консервативдик басылмасын чыгарган Epoch Media Group менен байланыштырат.
Белгиленгендей, акциянын алкагында социалдык тармактардагы жарнактарга 9 миллион долларга жакын каражат жумшалган.Фейк аккаунттар аркылуу жарыяланган контент негизинен АКШ жана Вьетнамдан келген колдонуучуларга арналган.
Мындан тышкары, иштеп чыгуучулар Грузияда жасалма эсептердин кыйла чоң тармагын аныктап, бөгөттөп салышкан. Анда 39 аккаунт жана 300дөн ашык барак бар. Бул тармак грузин бийлиги менен байланышы бар деп болжолдонууда жана анын максаты азыркы бийлик тууралуу оң пикир калыптандыруу жана оппозициялык партияларды сындоо болгон.
Фейсбуктун айтымында, фейк аккаунттардын ачылышы жалган маалымат таратуу жана коомдук пикирди манипуляциялоо үчүн колдонулган куралдар кандайча өнүгүп жатканын көрсөтүп турат. Жасалма профилдердин сүрөттөрү машина үйрөнүү менен нейрондук тармактарга негизделген алгоритмдерди колдонуу менен түзүлгөн. Бирок, Facebook өкүлү белгилегендей, ушундай жол менен түзүлгөн сүрөттөр компаниянын автоматташтырылган системалары фейк аккаунттарды аныктоого тоскоол болбойт, анткени бул процесс аккаунттун жүрүм-турумун талдоого негизделген.
Source: 3dnews.ru