NVIDIA и Ericsson ќе го пропуштат MWC 2020 поради коронавирус

Најголемиот меѓународен настан во областа на мобилните технологии и мобилните комуникации, MWC 2020, ќе се одржи на крајот на месецот, но се чини дека на него нема да земат учество сите компании.

Шведскиот производител на телекомуникациска опрема Ериксон во петокот ја објави својата одлука да го прескокне MWC 2020 поради загриженоста за појава на коронавирус во Кина.

По ова, најголемата светска изложба на мобилна технологија доби уште еден удар - NVIDIA, еден од спонзорите на настанот, објави дека нема да испраќа вработени на MWC 2020 во Барселона поради „здравствени ризици поврзани со коронавирусот“.

„Справувањето со ризиците за јавното здравје поврзани со коронавирусот и обезбедувањето на безбедноста на нашите колеги, партнери и клиенти е наш најголем приоритет... Со нетрпение очекуваме да ја споделиме нашата работа во AI, 5G и vRAN со индустријата. Жалиме што нема да учествуваме, но веруваме дека ова е правилна одлука“, се вели во соопштението на компанијата.

Претходно за одбивањето да учествува на MWC 2020 изјави Компанијата LG. Со оглед на тоа што Шпанија го потврди првиот случај на коронавирус во земјата пред една недела, некои компании веруваат дека без вакцина и повеќе информации за болеста, од која веќе починаа повеќе од 720 луѓе, подобро е да се остане дома.

Организаторот GSMA рече дека „продолжува да го следи и проценува потенцијалното влијание на коронавирусот на MWC Barcelona 2020, бидејќи здравјето и безбедноста на изложувачите, посетителите и персоналот се од огромно значење“.

Извор: 3dnews.ru