Жил бүр зохиогддог CES 2020 үзэсгэлэнд энэ өдрүүдэд Toyota Motor Corp-ын төлөөлөгчид оролцож байна. Японд "ирээдүйн хот"-ын прототипийг байгуулахаар төлөвлөж байгаагаа зарлав. Фүжи уулын бэлд орших 71 га талбайд баригдана. Хотыг устөрөгчийн түлшний эсийн эх үүсвэрээр тэжээнэ гэж таамаглаж байна. Энэ нь бие даасан автомашин, ухаалаг гэр, хиймэл оюун ухаан болон бусад дэвшилтэт технологиудыг турших нэгэн төрлийн лаборатори болох юм.
Тоёотагийн ирээдүйн хотыг Нэхмэл хот гэж нэрлэнэ. Нэхмэлийн машин үйлдвэрлэж түүхийг эхлүүлсэн Тоёота компанийн өнгөрсөн үеийг тус хотын нэрээр илэрхийлжээ. Энэ оны сүүлээр хаагдахаар төлөвлөж буй хуучин автомашины үйлдвэрийн суурин дээр хотыг байгуулах юм. Эхний шатанд тус хотод 2000 орчим оршин суугч, дэвшилтэт технологи боловсруулахад оролцдог эрдэмтэн судлаачдыг хүлээн авах боломжтой. Тоёота ирэх онд эхлүүлэхээр төлөвлөж буй төслийн зардлын талаар мэдээлэл өгөхгүй байна.
Данийн архитектор Бьярке Ингелс хотын байгууламжийг төлөвлөнө гэж зарлав. Архитекторын компани Нью-Йорк дахь Дэлхийн худалдааны хоёр дахь төв болон Цахиурын хөндий, Лондон дахь технологийн аварга Google-ийн оффисуудын зураг төслийг боловсруулахад оролцож байжээ.
Тоёота компани төслийг шинэ технологийн туршилтын талбар болгон ашиглах хүсэлтэй бусад үйлдвэрлэгчидтэй хамтран ажиллахад нээлттэй гэдгээ мэдэгдэв. Энэ төслийн хэрэгжилтийн хүрээнд “ирээдүйн хот” байгуулах сонирхолтой бусад компаниуд ирээдүйд Японы корпорацид нэгдэх боломжтой гэсэн үг.
Эх сурвалж: 3dnews.ru