“Huawei” технологийг ашиглах нь үндэсний аюулгүй байдалд заналхийлж байна гэж үзэж буй АНУ-ын зүгээс үзүүлж буй дарамт шахалтаас үүдэн Их Британи Хятадын компанийн 5G төхөөрөмжөөс өөр хувилбар хайж эхэлжээ. Ройтерс агентлагийн эх сурвалжийн мэдээлснээр Британийн албаны хүмүүс Өмнөд Солонгос, Японы компаниудтай 5G сүлжээний тоног төхөөрөмж нийлүүлэх талаар ярилцсан байна.
Японы NEC Corp болон Өмнөд Солонгосын Самсунг Электроникс компанитай хийсэн яриа хэлэлцээ нь 5G тоног төхөөрөмж нийлүүлэгчдийг төрөлжүүлэх талаар өнгөрсөн жил Их Британиас зарласан төлөвлөгөөний нэг хэсэг гэж Блүүмберг анх мэдээлжээ.
Нэгдүгээр сард Их Британи Huawei-г "өндөр эрсдэлтэй ханган нийлүүлэгч" гэж тодорхойлж, 5G сүлжээг байгуулахад оролцох оролцоог нь хязгаарлаж, сүлжээний үндсэн тоног төхөөрөмж нийлүүлэгчдээс хассан.
Энэ нь хангалттай биш гэж АНУ үзэж байгаа бөгөөд Британийн операторууд Huawei-ийн тоног төхөөрөмжийн хэрэглээг бүрмөсөн устгах шахалт үзүүлсээр байна.
Лхагва гарагт АНУ-ын сенатор Том Коттон 5G сүлжээг нэвтрүүлэхэд Huawei-д оролцохыг зөвшөөрсөн шийдвэр нь цэргийн хамтын ажиллагаанд сөргөөр нөлөөлж, хоёр орны худалдааны хэлэлцээрт асуудал үүсгэж болзошгүйг Их Британид анхаарууллаа.
Эх сурвалж: 3dnews.ru