Цахим эх сурвалжийн мэдээлснээр дижитал валютын чиглэлээр хамтарсан судалгаа хийж буй зургаан улсын төв банкны тэргүүн нар энэ оны дөрөвдүгээр сард Вашингтонд болох уулзалтыг зохион байгуулах боломжийг судалж байгаа аж.
Хэлэлцээнд Европын Төв банкны тэргүүнээс гадна Их Британи, Япон, Канад, Швед, Швейцарийн төв банкны тэргүүн нар оролцоно. Японы Төв банкны төлөөлөгч хэлэхдээ, уулзалтын яг товыг хараахан тогтоогоогүй байна. Мөнгө гаргагчийн хувьд хамааралтай хэвээр байхын тулд төв банкууд хурдацтай дижиталчлалд уян хатан хариу үйлдэл үзүүлэх ёстойг тэрээр мөн тэмдэглэв.
Өмнө дурдсан орнуудын төв банкны төлөөлөгчид дижитал валют гаргахтай холбоотой асуудлыг хэлэлцэх уулзалт зохион байгуулахаар төлөвлөж байгаагаа өнгөрсөн сард мэдэгдсэн. Түүнчлэн, цаашид Төв банкууд дижитал валют гаргавал хил дамнасан төлбөр тооцоог оновчтой болгох арга зам, аюулгүй байдлын асуудлыг хэлэлцэхээр төлөвлөжээ. Хуралдааны үр дүнгийн талаарх завсрын тайланг энэ оны зургадугаар сар гэхэд бэлтгэж, намар гэхэд эцсийн хувилбар нь гарах төлөвтэй байна.
Дэлхий даяар төв банкууд өөрсдийн дижитал валютыг гаргахаар төлөвлөж байна. Томоохон төв банкуудаас Хятад улс дижитал валютыг хөгжүүлэхэд тэргүүлсэн боловч төслийн талаар тийм ч сайн мэддэггүй. Японы төв банк Европын төв банктай энэ чиглэлээр судалгааны төсөл хэрэгжүүлсэн ч ойрын хугацаанд өөрийн дижитал валют гаргах бодолгүй байгаагаа мэдэгджээ.
Эх сурвалж: 3dnews.ru